ਫਾਜ਼ਿਲਕਾ, 9 ਦਸੰਬਰ | ਅਬੋਹਰ ‘ਚ ਕਾਰ ਬੇਕਾਬੂ ਹੋ ਕੇ ਦਰੱਖਤ ਨਾਲ ਟਕਰਾ ਗਈ। ਹਾਦਸੇ ਵਿਚ ਨੌਜਵਾਨ ਦੀ ਮੌਤ ਹੋ ਗਈ। ਨੌਜਵਾਨ ਆਪਣੀ ਚਚੇਰੀ ਭੈਣ ਦੇ ਵਿਆਹ ਲਈ ਕਾਰ ਦੇਖਣ ਅਬੋਹਰ ਆਇਆ ਸੀ, ਜਿਸ ਕਾਰਨ ਵਿਆਹ ਦੀਆਂ ਖੁਸ਼ੀਆਂ ਹੁਣ ਸੋਗ ਵਿਚ ਬਦਲ ਗਈਆਂ ਹਨ।
ਇਹ ਹਾਦਸਾ ਦੇਰ ਰਾਤ ਰਾਜਪੁਰਾ-ਬਹਾਵਵਾਲਾ ਨੇੜੇ ਵਾਪਰਿਆ। ਮ੍ਰਿਤਕ ਦੀ ਪਛਾਣ ਅਰਵਿੰਦ ਕੁਮਾਰ (26) ਵਾਸੀ ਪਿੰਡ ਮਾਨਿਆਂਵਾਲੀ ਵਜੋਂ ਹੋਈ ਹੈ। ਨੌਜਵਾਨ ਦੇਰ ਰਾਤ ਅਬੋਹਰ ਤੋਂ ਵਾਪਸ ਆ ਰਿਹਾ ਸੀ। ਹਾਦਸਾ ਇੰਨਾ ਭਿਆਨਕ ਸੀ ਕਿ ਕਾਰ ਕਰੀਬ 15 ਫੁੱਟ ਦੀ ਉਚਾਈ ‘ਤੇ ਦਰੱਖਤ ਨਾਲ ਜਾ ਟਕਰਾਈ, ਜਿਸ ਕਾਰਨ ਕਾਰ ਵੱਖ-ਵੱਖ ਹਿੱਸਿਆਂ ਵਿਚ ਵੰਡੀ ਗਈ। ਡਰਾਈਵਰ ਅਰਵਿੰਦ ਕਾਰ ‘ਚੋਂ ਉਤਰ ਕੇ ਖੇਤਾਂ ‘ਚ ਜਾ ਡਿੱਗਿਆ। ਸਥਾਨਕ ਲੋਕਾਂ ਨੇ ਗੰਭੀਰ ਹਾਲਤ ‘ਚ ਅਰਵਿੰਦ ਨੂੰ ਸਾਦੁਲਸ਼ਹਿਰ ਦੇ ਹਸਪਤਾਲ ਪਹੁੰਚਾਇਆ। ਇੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।
ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਮ੍ਰਿਤਕ ਦੇ ਘਰ ‘ਚ ਮਾਤਮ ਛਾ ਗਿਆ। ਪੂਰੇ ਪਿੰਡ ਵਿਚ ਸੋਗ ਦੀ ਲਹਿਰ ਦੌੜ ਗਈ। ਸਰਪੰਚ ਸੁਨੀਤਾ ਨਾਇਕ, ਸੁਰੇਸ਼ ਨਾਇਕ, ਸਾਬਕਾ ਸਰਪੰਚ ਅੰਜੂ ਯਾਦਵ, ਰਾਮ ਸਿੰਘ ਯਾਦਵ, ਰਜਿੰਦਰ ਯਾਦਵ, ਸੁਰੇਸ਼ ਸੋਨੀ, ਲੋਕੇਸ਼ ਯਾਦਵ ਆਦਿ ਨੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕਰਦਿਆਂ ਪਰਿਵਾਰ ਨੂੰ ਦਿਲਾਸਾ ਦਿੱਤਾ।
ਥਾਣਾ ਬਹਾਵਾਲਾ ਦੇ ਐਸਐਚਓ ਰਵਿੰਦਰ ਸਿੰਘ ਨੇ ਦੱਸਿਆ ਕਿ ਅਰਵਿੰਦ ਵਾਸੀ ਮਾਨਿਆਂਵਾਲੀ ਦੀ ਸੜਕ ਹਾਦਸੇ ਵਿਚ ਮੌਤ ਹੋ ਗਈ। ਮਿ੍ਤਕ ਦੀ ਲਾਸ਼ ਦਾ ਸਰਕਾਰੀ ਉਪ ਜ਼ਿਲਾ ਹਸਪਤਾਲ ਸਾਦੁਲਸ਼ਹਿਰ ਵਿਖੇ ਪੋਸਟਮਾਰਟਮ ਕਰਵਾ ਕੇ ਲਾਸ਼ ਵਾਰਸਾਂ ਦੇ ਹਵਾਲੇ ਕਰ ਦਿੱਤੀ ਗਈ।
(Note : ਪੰਜਾਬ ਦੀਆਂ ਜ਼ਰੂਰੀ ਖਬਰਾਂ ਪੜ੍ਹਣ ਲਈ ਸਾਡੇ ਵਟਸਐਪ ਗਰੁੱਪ https://shorturl.at/0tM6T ਜਾਂ ਵਟਸਐਪ ਚੈਨਲ https://shorturl.at/Q3yRy ਨਾਲ ਜ਼ਰੂਰ ਜੁੜੋ।)
