ਫ਼ਿਰੋਜ਼ਪੁਰ | ਪਿੰਡ ਰੁਕਨਾ ਮੰਗਲਾ ਦਾ ਸਰਕਾਰੀ ਸਕੂਲ ਚੋਰਾਂ ਦਾ ਘਰ ਬਣ ਗਿਆ ਹੈ। ਚੋਰ ਜਦੋਂ ਚਾਹੁਣ ਲੋੜ ਦਾ ਸਾਮਾਨ ਲੈ ਜਾਂਦੇ ਹਨ। ਚੋਰ ਪਿਛਲੇ ਇਕ ਸਾਲ ਵਿਚ 8 ਵਾਰ ਸਕੂਲ ਵਿਚ ਚੋਰੀ ਕਰ ਚੁੱਕੇ ਹਨ। ਇੰਨਾ ਹੀ ਨਹੀਂ ਪਿਛਲੇ ਇਕ ਮਹੀਨੇ ਵਿਚ ਚੋਰੀ ਦੀਆਂ ਤਿੰਨ ਵਾਰਦਾਤਾਂ ਨੂੰ ਅੰਜਾਮ ਦਿੱਤਾ ਗਿਆ ਪਰ ਪੁਲਿਸ ਨੇ ਇਕ ਵਾਰ ਵੀ ਐਫਆਈਆਰ ਦਰਜ ਨਹੀਂ ਕੀਤੀ। ਚੋਰਾਂ ਤੋਂ ਤੰਗ ਆ ਕੇ ਪ੍ਰਿੰਸੀਪਲ ਨੇ ਸਕੂਲ ਦੇ ਗੇਟ ਦੇ ਬਾਹਰ ਪਰਚੀ ਚਿਪਕਾਈ ਹੈ।
ਇਸ ਵਿਚ ਅਪੀਲ ਕੀਤੀ ਜਾਂਦੀ ਹੈ ਕਿ ਤੁਸੀਂ ਸਾਰਾ ਸਾਮਾਨ ਚੋਰੀ ਕਰ ਲਿਆ ਹੈ। ਹੁਣ ਕੁਝ ਨਹੀਂ ਬਚਿਆ। ਕਿਰਪਾ ਕਰਕੇ ਹੁਣ ਤਾਲਾ ਨਾ ਤੋੜੀਓ। ਸਕੂਲ ਦੇ ਬਾਹਰ ਚਿਪਕਾਇਆ ਇਹ ਪਰਚਾ ਫਿਰੋਜ਼ਪੁਰ ਵਿਚ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ।
ਪ੍ਰਿੰਸੀਪਲ ਸੁਰਿੰਦਰਪਾਲ ਕੌਰ ਨੇ ਦੱਸਿਆ ਕਿ ਚੋਰ ਸਕੂਲ ‘ਚ ਕੁਝ ਵੀ ਨਹੀਂ ਛੱਡ ਰਹੇ। ਇਸ ਸਾਲ 2 ਲੱਖ ਤੋਂ ਵੱਧ ਦਾ ਨੁਕਸਾਨ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਚੋਰਾਂ ਨੇ ਸਕੂਲ ਵਿਚ ਰੱਖੇ ਖਿਡੌਣੇ, ਮਿੱਡ-ਡੇ-ਮੀਲ ਰਾਸ਼ਨ, ਸੀਸੀਟੀਵੀ ਅਤੇ ਕੰਪਿਊਟਰ ਚੋਰੀ ਕਰ ਲਿਆ ਹੈ। ਇਸ ਵਾਰ ਉਸ ਦੀ ਕੁਰਸੀ ਵੀ ਚੋਰੀ ਕਰ ਲਈ। ਇਸ ਮੌਕੇ ਸਕੂਲ ਦੇ ਅਧਿਆਪਕਾਂ ਨੇ ਦੱਸਿਆ ਕਿ ਗ੍ਰਾਂਟ ਮਿਲਣ ਤੋਂ ਬਾਅਦ ਉਹ ਨਵੀਆਂ ਵਸਤੂਆਂ ਖਰੀਦਦੇ ਹਨ।
ਕਈ ਵਾਰ ਅਸੀਂ ਚੀਜ਼ਾਂ ਲਿਆਉਣ ਲਈ ਆਪਣੀ ਜੇਬ ਵਿਚੋਂ ਖਰਚ ਕਰਦੇ ਹਾਂ ਤਾਂ ਜੋ ਪੜ੍ਹਾਈ ਪ੍ਰਭਾਵਿਤ ਨਾ ਹੋਵੇ। ਅਜਿਹੇ ‘ਚ ਇਕ ਮਹੀਨੇ ‘ਚ ਤੀਜੀ ਵਾਰ ਅਤੇ ਸਾਲ ‘ਚ 8ਵੀਂ ਵਾਰ ਸਕੂਲ ‘ਚ ਚੋਰੀ ਦੀ ਘਟਨਾ ਤੋਂ ਦੁਖੀ ਸਰਕਾਰੀ ਪ੍ਰਾਇਮਰੀ ਸਕੂਲ ਰੁਕਨਾ ਮੰਗਲਾ ਦੀ ਪ੍ਰਿੰਸੀਪਲ ਨੇ ਪ੍ਰਸ਼ਾਸਨ ਨੂੰ ਚੋਰਾਂ ਨੂੰ ਨੱਥ ਪਾਉਣ ਦੀ ਅਪੀਲ ਕੀਤੀ ਹੈ। ਇਸ ਸਬੰਧੀ ਗੱਲਬਾਤ ਕਰਦਿਆਂ ਸੁਰਿੰਦਰਪਾਲ ਕੌਰ ਨੇ ਦੱਸਿਆ ਕਿ ਪਿਛਲੇ ਇਕ ਸਾਲ ਤੋਂ ਸਕੂਲ ‘ਚ ਚੋਰੀ ਦੀਆਂ ਸ਼ਿਕਾਇਤਾਂ ਥਾਣੇ ‘ਚ ਕੀਤੀਆਂ ਗਈਆਂ ਸਨ ਪਰ ਪੁਲਿਸ ਨੇ ਇਕ ਵਾਰ ਵੀ ਐਫਆਈਆਰ ਦਰਜ ਨਹੀਂ ਕੀਤੀ।
