ਮੱਧ ਪ੍ਰਦੇਸ਼ | ਸ਼ਿਵਪੁਰੀ ਜ਼ਿਲੇ ਦੇ ਬੈਰਾੜ ਹੈਲਥ ਸੈਂਟਰ ਤੋਂ ਲਾਪ੍ਰਵਾਹੀ ਦਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇਕ ਸਿਹਤ ਕੇਂਦਰ ਦੇ ਸਵੀਪਰ ਨੇ ਡਾਕਟਰ ਦਾ ਚਿੱਟਾ ਕੋਟ ਪਾ ਕੇ ਹਾਦਸੇ ਵਿਚ ਜ਼ਖਮੀ ਹੋਏ ਨੌਜਵਾਨ ਦੀ ਲੱਤ ਨੂੰ ਟਾਂਕੇ ਲਗਾਏ।
ਪਰਿਵਾਰਕ ਮੈਂਬਰਾਂ ਨੇ ਜਦੋਂ ਏਪ੍ਰੀਨ ਪਹਿਨੇ ਸਵੀਪਰ ਤੋਂ ਜਾਣਕਾਰੀ ਲਈ ਤਾਂ ਸਾਰਾ ਮਾਮਲਾ ਸਾਹਮਣੇ ਆਇਆ ਕਿ ਨੌਜਵਾਨ ਨਾ ਤਾਂ ਡਾਕਟਰ ਹੈ ਅਤੇ ਨਾ ਹੀ ਨਰਸਿੰਗ ਸਟਾਫ। ਇਸ ਦੇ ਬਾਵਜੂਦ ਉਹ ਜ਼ਖਮੀਆਂ ਦਾ ਇਲਾਜ ਕਰ ਰਿਹਾ ਹੈ। ਦਰਅਸਲ, ਟੋਰੀਆ ਪਿੰਡ ਦਾ ਇੱਕ ਨੌਜਵਾਨ ਆਪਣੇ ਪਿੰਡ ਤੋਂ ਬਾਈਕ ‘ਤੇ ਬੈਰਾੜ ਵੱਲ ਆ ਰਿਹਾ ਸੀ। ਇਸ ਦੌਰਾਨ ਬਾਈਕ ਤਿਲਕਣ ਕਾਰਨ ਉਹ ਹਾਦਸੇ ਦਾ ਸ਼ਿਕਾਰ ਹੋ ਗਿਆ। ਜ਼ਖਮੀ ਹਰਿਆਨ ਦੀ ਲੱਤ ‘ਤੇ ਗੰਭੀਰ ਸੱਟ ਲੱਗੀ ਹੈ, ਜਿਸ ਤੋਂ ਬਾਅਦ ਉਸ ਨੂੰ ਬੈਰਾੜ ਦੇ ਸਿਹਤ ਕੇਂਦਰ ‘ਚ ਦਾਖਲ ਕਰਵਾਇਆ ਗਿਆ।
ਇਲਾਜ ਦੌਰਾਨ ਉਸ ਦੀ ਲੱਤ ‘ਤੇ ਟਾਂਕੇ ਲਗਵਾਉਣੇ ਪਏ ਪਰ ਇਹ ਕੰਮ ਕਿਸੇ ਨਰਸਿੰਗ ਸਟਾਫ਼ ਅਤੇ ਡਾਕਟਰ ਵੱਲੋਂ ਨਹੀਂ ਸਗੋਂ ਇੱਕ ਸਵੀਪਰ ਵੱਲੋਂ ਕੀਤਾ ਗਿਆ। ਜਦੋਂ ਰਿਸ਼ਤੇਦਾਰਾਂ ਨੂੰ ਸ਼ੱਕ ਹੋਇਆ ਤਾਂ ਉਨ੍ਹਾਂ ਨੇ ਕਰਮਚਾਰੀ ਤੋਂ ਜ਼ਖਮੀ ਨੂੰ ਲਗਾਏ ਜਾਣ ਵਾਲੇ ਟਾਂਕੇ ਦੀ ਗਿਣਤੀ ਬਾਰੇ ਪੁੱਛਿਆ। ਇਸ ਦੌਰਾਨ ਸਵੀਪਰ ਭਰਤ ਬਾਲਮੀਕੀ ਨੇ ਕਿਹਾ ਕਿ ਉਨ੍ਹਾਂ ਦਾ ਕੰਮ ਸਿਰਫ਼ ਟਾਂਕੇ ਲਾਉਣਾ ਹੈ ਨਾ ਕਿ ਗਿਣਨਾ।
ਇਕ ਵੀਡੀਓ ‘ਚ ਸਵੀਪਰ ਭਰਤ ਬਾਲਮੀਕੀ ਇਹ ਕਹਿੰਦੇ ਹੋਏ ਨਜ਼ਰ ਆ ਰਿਹਾ ਹੈ ਕਿ ਜਾਂ ਤਾਂ ਹਸਪਤਾਲ ‘ਚ ਉਹ ਟਾਂਕੇ ਲਗਾਉਂਦਾ ਹੈ ਜਾਂ ਫਿਰ ਵਾਰਡ ਬੁਆਏ। ਡਾਕਟਰਾਂ ਵੱਲੋਂ ਇਹ ਕੰਮ ਨਾ ਕਰਨ ਬਾਰੇ ਪੁੱਛੇ ਜਾਣ ’ਤੇ ਸਵੀਪਰ ਨੇ ਕਿਹਾ ਕਿ ਡਾਕਟਰ ਨਕਲ ਕਰਕੇ ਪੜ੍ਹ-ਲਿਖ ਕੇ ਆਏ ਹਨ, ਨਾ ਤਾਂ ਟੀਕਾ ਲਗਾਉਣਾ ਜਾਣਦੇ ਹਨ ਅਤੇ ਨਾ ਹੀ ਟਾਂਕੇ ਲਾਉਣੇ, ਇਸ ਲਈ ਉਨ੍ਹਾਂ ਨੂੰ ਇਹ ਕੰਮ ਕਰਨਾ ਪੈਂਦਾ ਹੈ।
ਸ਼ਿਵਪੁਰੀ ਦੇ ਸੀਐਮਐਚਓ ਡਾਕਟਰ ਪਵਨ ਜੈਨ ਨਾਲ ਗੱਲ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਹ ਕੈਮਰੇ ‘ਤੇ ਕੁਝ ਵੀ ਬੋਲਣ ਨੂੰ ਤਿਆਰ ਨਹੀਂ ਸਨ। ਉਨ੍ਹਾਂ ਕਿਹਾ ਕਿ ਸਿਹਤ ਕੇਂਦਰ ਵਿੱਚ ਇਹ ਕੰਮ ਕਰਨ ਦਾ ਅਧਿਕਾਰ ਨਰਸਿੰਗ ਸਟਾਫ਼ ਅਤੇ ਡਾਕਟਰਾਂ ਕੋਲ ਹੈ। ਜੇਕਰ ਬੈਰਾੜ ਹੈਲਥ ਸੈਂਟਰ ਵਿੱਚ ਇਸ ਤਰ੍ਹਾਂ ਦੀ ਅਣਗਹਿਲੀ ਪਾਈ ਗਈ ਤਾਂ ਉਹ ਸਬੰਧਤ ਖ਼ਿਲਾਫ਼ ਕਾਰਵਾਈ ਜ਼ਰੂਰ ਕਰਨਗੇ।
