ਜਲੰਧਰ, 28 ਸਤੰਬਰ | ਸ਼ਹਿਰ ‘ਚ ਲੁੱਟ-ਖੋਹ ਦੀ ਇਕ ਹੋਰ ਵਾਰਦਾਤ ਵਾਪਰੀ ਹੈ। ਹੁਣ ਫਲ ਵਿਕਰੇਤਾ ਮਨੂ ਵਾਸੀ ਅਰਜੁਨ ਨਗਰ ਨੂੰ ਅੱਜ ਸਵੇਰੇ ਰਸਤੇ ਵਿਚ ਲੁਟੇਰਿਆਂ ਵਲੋਂ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲਾ ਕਰਕੇ ਲੁੱਟ ਲਿਆ ਗਿਆ। ਉਹ ਉਸ ਦੀ ਜੇਬ ‘ਚੋਂ ਨਕਦੀ ਅਤੇ ਮੋਬਾਇਲ ਖੋਹ ਕੇ ਫਰਾਰ ਹੋ ਗਏ। ਇਸ ਘਟਨਾ ‘ਚ ਉਸ ਨੂੰ ਕਾਫੀ ਸੱਟਾਂ ਲੱਗੀਆਂ।
ਲੁੱਟ ਦੀ ਇਹ ਸਾਰੀ ਘਟਨਾ ਉਥੇ ਲੱਗੇ ਸੀਸੀਟੀਵੀ ਕੈਮਰਿਆਂ ਵਿਚ ਵੀ ਕੈਦ ਹੋ ਗਈ। ਫਲ ਵਿਕਰੇਤਾ ਮਨੂ ਨੇ ਦੱਸਿਆ ਕਿ ਲੁਟੇਰੇ ਤਿੰਨ ਸਨ ਅਤੇ ਉਨ੍ਹਾਂ ਦੇ ਹੱਥਾਂ ਵਿਚ ਤੇਜ਼ਧਾਰ ਹਥਿਆਰ ਅਤੇ ਚਾਕੂ ਸਨ। ਉਸ ਨੇ ਦੱਸਿਆ ਕਿ ਤਿੰਨੇ ਲੁਟੇਰੇ ਕਾਲੇ ਰੰਗ ਦੇ ਮੋਟਰਸਾਈਕਲ ‘ਤੇ ਸਵਾਰ ਸਨ ਤੇ ਪਤਾ ਪੁੱਛਣ ਦੇ ਬਹਾਨੇ ਉਸ ਨੂੰ ਰੋਕ ਲਿਆ ਅਤੇ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲਾ ਕਰ ਦਿੱਤਾ।
ਅਰਜੁਨ ਨਗਰ ਵਾਸੀ ਮਨੂ ਨੇ ਦੱਸਿਆ ਕਿ ਰੋਜ਼ਾਨਾ ਦੀ ਤਰ੍ਹਾਂ ਉਹ ਸਵੇਰੇ ਫਲ ਖਰੀਦਣ ਲਈ ਮੰਡੀ ਜਾ ਰਿਹਾ ਸੀ। ਜਿਵੇਂ ਹੀ ਉਹ ਘਰ ਤੋਂ ਬਾਹਰ ਨਿਕਲ ਕੇ ਸੜਕ ‘ਤੇ ਪਹੁੰਚਿਆ ਤਾਂ ਇਕ ਨੌਜਵਾਨ ਨੇ ਮੈਨੂੰ ਰੋਕ ਲਿਆ। ਉਸ ਨੇ ਪਤਾ ਦੱਸਣ ਲਈ ਕਿਹਾ। ਜਿਵੇਂ ਹੀ ਉਹ ਪਤਾ ਦੱਸਣ ਲਈ ਸੜਕ ‘ਤੇ ਰੁਕਿਆ ਤਾਂ ਮੋਟਰਸਾਈਕਲ ਸਵਾਰ ਦੋ ਨੌਜਵਾਨ ਉਸ ਦੇ ਨੇੜੇ ਆ ਗਏ ਅਤੇ ਲੜਾਈ ਸ਼ੁਰੂ ਕਰ ਦਿੱਤੀ। ਉਸਦੇ ਹੱਥਾਂ ਵਿਚ ਤਿੱਖੇ ਦਾਤਰ ਸਨ। ਨਕਦੀ ਅਤੇ ਹੋਰ ਦਸਤਾਵੇਜ਼ਾਂ ਦੇ ਨਾਲ-ਨਾਲ ਉਸ ਦੀ ਜੇਬ ਵਿਚੋਂ ਫੋਨ ਵੀ ਲੁੱਟ ਲਿਆ। ਲੁਟੇਰੇ ਪਹਿਲਾਂ ਹੀ ਸੜਕ ‘ਤੇ ਜਾਮ ਲਗਾ ਕੇ ਬੈਠੇ ਸਨ।
