ਨਵੀਂ ਦਿੱਲੀ | ਸਾਬਕਾ ਭਾਰਤੀ ਕ੍ਰਿਕਟਰ ਸੁਰੇਸ਼ ਰੈਨਾ ਨੇ ਕ੍ਰਿਕਟ ਦੇ ਸਾਰੇ ਰੂਪਾਂ ਤੋਂ ਸੰਨਿਆਸ ਲੈਣ ਦਾ ਐਲਾਨ ਕਰ ਦਿੱਤਾ ਹੈ। ਮਿਸਟਰ ਆਈਪੀਐਲ ਦੇ ਨਾਂ ਨਾਲ ਮਸ਼ਹੂਰ ਰੈਨਾ ਨੇ ਅੱਜ ਯਾਨੀ ਮੰਗਲਵਾਰ ਨੂੰ ਟਵੀਟ ਕਰਕੇ ਆਪਣੇ ਫੈਸਲੇ ਦੀ ਜਾਣਕਾਰੀ ਦਿੱਤੀ। ਉਸਨੇ ਆਪਣੇ ਟਵੀਟ ਵਿੱਚ ਲਿਖਿਆ, “ਸਾਡੇ ਦੇਸ਼ ਤੇ ਰਾਜ ਯੂਪੀ ਦੀ ਨੁਮਾਇੰਦਗੀ ਕਰਨਾ ਬਹੁਤ ਸਨਮਾਨ ਦੀ ਗੱਲ ਹੈ। ਮੈਂ ਕ੍ਰਿਕਟ ਦੇ ਸਾਰੇ ਰੂਪਾਂ ਤੋਂ ਸੰਨਿਆਸ ਦਾ ਐਲਾਨ ਕਰਨਾ ਚਾਹੁੰਦਾ ਹਾਂ। ਮੈਂ ਬੀਸੀਸੀਆਈ, ਯੂਪੀ ਕ੍ਰਿਕਟ ਐਸੋਸੀਏਸ਼ਨ, ਚੇਨਈ ਸੁਪਰ ਕਿੰਗਜ਼ ਤੇ ਰਾਜੀਵ ਸ਼ੁਕਲਾ ਸਰ ਤੇ ਆਪਣੇ ਸਾਰੇ ਪ੍ਰਸ਼ੰਸਕਾਂ ਦਾ ਧੰਨਵਾਦ ਕਰਨਾ ਚਾਹਾਂਗਾ।”
ਜ਼ਿਕਰਯੋਗ ਹੈ ਕਿ ਰੈਨਾ ਨੇ 15 ਅਗਸਤ 2020 ਨੂੰ ਧੋਨੀ ਦੇ ਨਾਲ ਅੰਤਰਰਾਸ਼ਟਰੀ ਕ੍ਰਿਕਟ ਤੋਂ ਸੰਨਿਆਸ ਲੈ ਲਿਆ ਸੀ। ਪਰ ਉਹ ਘਰੇਲੂ ਕ੍ਰਿਕਟ ਖਾਸ ਕਰਕੇ ਆਈਪੀਐਲ ਵਿੱਚ ਚੇਨਈ ਸੁਪਰ ਕਿੰਗਜ਼ ਲਈ ਖੇਡ ਰਿਹਾ ਸੀ। ਪਰ ਪਿਛਲੇ ਸੀਜ਼ਨ ਵਿੱਚ, ਸੀਐਸਕੇ ਨੇ ਉਸ ਨੂੰ ਮੈਗਾ ਨਿਲਾਮੀ ਤੋਂ ਪਹਿਲਾਂ ਛੱਡ ਦਿੱਤਾ ਤੇ ਫਿਰ ਨਿਲਾਮੀ ਵਿੱਚ ਵੀ ਉਸ ਲਈ ਬੋਲੀ ਨਹੀਂ ਲਗਾਈ। ਇਸ ਤੋਂ ਬਾਅਦ ਰੈਨਾ ਪਹਿਲੀ ਵਾਰ ਆਈ.ਪੀ.ਐੱਲ ‘ਚ ਅਣਸੋਲਡ ਰਹੇ।
ਰੈਨਾ ਨੇ ਇਕ ਦਿਨ ਪਹਿਲਾਂ ਯਾਨੀ 5 ਸਤੰਬਰ ਨੂੰ ਕ੍ਰਿਕਟ ਖੇਡਦੇ ਹੋਏ ਵੀਡੀਓ ਵੀ ਅਪਲੋਡ ਕੀਤਾ ਸੀ। ਪਰ ਇੱਕ ਦਿਨ ਬਾਅਦ, ਉਸਨੇ ਆਪਣੇ ਫੈਸਲੇ ਨਾਲ ਪ੍ਰਸ਼ੰਸਕਾਂ ਨੂੰ ਹੈਰਾਨ ਕਰ ਦਿੱਤਾ। ਰੈਨਾ ਦੇ ਇਸ ਫੈਸਲੇ ਦਾ ਮਤਲਬ ਹੈ ਕਿ ਉਹ ਹੁਣ IPL ਜਾਂ ਕਿਸੇ ਹੋਰ ਘਰੇਲੂ ਲੀਗ ‘ਚ ਖੇਡਦੇ ਨਜ਼ਰ ਨਹੀਂ ਆਉਣਗੇ। ਮੀਡੀਆ ਰਿਪੋਰਟਾਂ ਮੁਤਾਬਕ ਰੈਨਾ ਨੇ ਵਿਦੇਸ਼ੀ ਲੀਗਾਂ ‘ਚ ਖੇਡਣ ਲਈ ਇਹ ਕਦਮ ਚੁੱਕਿਆ ਹੈ। ਇਹ ਵੀ ਕਿਆਸ ਲਗਾਏ ਜਾ ਰਹੇ ਹਨ ਕਿ ਇਹ ਆਲਰਾਊਂਡਰ ਅਗਲੇ ਸਾਲ ਤੋਂ ਸ਼ੁਰੂ ਹੋਣ ਵਾਲੀ ਦੱਖਣੀ ਅਫਰੀਕਾ ਦੀ ਟੀ-20 ਲੀਗ ‘ਚ ਖੇਡ ਸਕਦਾ ਹੈ। ਇਸ ਲੀਗ ਵਿੱਚ ਵੀ ਚੇਨਈ ਸੁਪਰ ਕਿੰਗਜ਼ ਦੇ ਮਾਲਕਾਂ ਨੇ ਜੋਹਾਨਸਬਰਗ ਫ੍ਰੈਂਚਾਇਜ਼ੀ ਨੂੰ ਖਰੀਦਿਆ ਹੈ। ਇਹ ਲੀਗ ਆਈਪੀਐਲ ਦੀ ਤਰਜ਼ ‘ਤੇ ਖੇਡੀ ਜਾਵੇਗੀ, ਜਿਸ ਵਿੱਚ ਸਾਰੀਆਂ ਛੇ ਟੀਮਾਂ ਨੂੰ ਆਈਪੀਐਲ ਫਰੈਂਚਾਇਜ਼ੀ ਦੇ ਮਾਲਕਾਂ ਨੇ ਖਰੀਦਿਆ ਹੈ।
ਰੈਨਾ ਦੇ ਆਈਪੀਐਲ ਕਰੀਅਰ ਦੀ ਗੱਲ ਕਰੀਏ ਤਾਂ ਉਹ ਲੰਬੇ ਸਮੇਂ ਤੋਂ ਚੇਨਈ ਸੁਪਰ ਕਿੰਗਜ਼ ਨਾਲ ਜੁੜੇ ਹੋਏ ਸਨ। ਉਸਨੇ ਲੀਗ ਵਿੱਚ ਕੁੱਲ 205 ਮੈਚ ਖੇਡੇ ਅਤੇ 5528 ਦੌੜਾਂ ਬਣਾਈਆਂ। ਇਸ ਦੌਰਾਨ ਉਨ੍ਹਾਂ ਦੇ ਬੱਲੇ ਨੇ ਇੱਕ ਸੈਂਕੜਾ ਅਤੇ 39 ਅਰਧ ਸੈਂਕੜੇ ਵੀ ਲਗਾਏ। ਰੈਨਾ ਦੇ ਅੰਤਰਰਾਸ਼ਟਰੀ ਕਰੀਅਰ ‘ਤੇ ਨਜ਼ਰ ਮਾਰੀਏ ਤਾਂ ਉਸ ਨੇ ਤਿੰਨੋਂ ਫਾਰਮੈਟਾਂ ‘ਚ ਕੁੱਲ 322 ਮੈਚ ਖੇਡੇ ਅਤੇ 32.87 ਦੀ ਔਸਤ ਅਤੇ 92.45 ਦੀ ਸਟ੍ਰਾਈਕ ਰੇਟ ਨਾਲ 7988 ਦੌੜਾਂ ਬਣਾਈਆਂ। ਉਸ ਨੇ ਇਸ ਵਿੱਚ ਸੱਤ ਸੈਂਕੜੇ ਅਤੇ 48 ਅਰਧ ਸੈਂਕੜੇ ਵੀ ਲਗਾਏ। ਰੈਨਾ ਨੇ ਗੇਂਦਬਾਜ਼ੀ ‘ਚ ਵੀ ਕੁੱਲ 62 ਵਿਕਟਾਂ ਲਈਆਂ, ਜਦਕਿ ਫੀਲਡਿੰਗ ‘ਚ ਵੀ 167 ਕੈਚ ਲਏ।
