ਉੱਤਰ ਪ੍ਰਦੇਸ਼ | ਇਥੋਂ ਵੱਡੀ ਖਬਰ ਸਾਹਮਣੇ ਆਈ ਹੈ। ਪੀਲੀਭੀਤ ਦਾ ਮੋਹਨਾਪੁਰ ਗੁਰਦੁਆਰਾ ਹੁਣ ਪੁਲਿਸ ਦੀ ਨਿਗਰਾਨੀ ਹੇਠ ਹੈ। 25 ਮਾਰਚ ਦੀ ਸ਼ਾਮ ਤਕ ਗੁਰਦੁਆਰੇ ਦੇ ਸੀਸੀਟੀਵੀ ਫੁਟੇਜ ਗਾਇਬ ਹੋ ਗਏ ਹਨ। ਫਰਾਰ ‘ਵਾਰਿਸ ਪੰਜਾਬ ਦੇ’ ਮੁਖੀ ਅੰਮ੍ਰਿਤਪਾਲ ਸਿੰਘ ਤੇ ਉਸ ਦੇ ਸਾਥੀ ਪਪਲਪ੍ਰੀਤ ਸਿੰਘ ਨਾਲ ਸਬੰਧਤ ਮਾਮਲੇ ਦੀ ਜਾਂਚ ਕਰ ਰਹੀ ਪੁਲਿਸ ਟੀਮ ਮਾਮਲੇ ਦੀ ਜਾਂਚ ਲਈ ਐਤਵਾਰ ਨੂੰ ਪੀਲੀਭੀਤ ਪਹੁੰਚੀ। ਗੁਰਦੁਆਰੇ ‘ਚ ਇਕ ਕਾਰ ਸੇਵਕ (ਵਲੰਟੀਅਰ) ਜੋਗਾ ਸਿੰਘ ਨੂੰ 28 ਮਾਰਚ ਨੂੰ ਪੰਜਾਬ ਦੇ ਫਗਵਾੜਾ ਨੇੜੇ ਇਕ ਛੱਡੀ ਹੋਈ ਗੱਡੀ ਦੀ ਬਰਾਮਦਗੀ ਤੋਂ ਬਾਅਦ ਪੰਜਾਬ ਪੁਲਿਸ ਨੇ 30 ਮਾਰਚ ਨੂੰ ਲੁਧਿਆਣਾ ਵਿਚ ਗ੍ਰਿਫਤਾਰ ਕਰ ਲਿਆ ਸੀ।
ਪੁਲਿਸ ਨੇ ਡਰਾਈਵਰ ਗੁਰਵੰਤ ਸਿੰਘ ਨੂੰ 29 ਮਾਰਚ ਨੂੰ ਹੁਸ਼ਿਆਰਪੁਰ ਤੋਂ ਗ੍ਰਿਫ਼ਤਾਰ ਕੀਤਾ ਸੀ। ਪੁਲਿਸ ਟੀਮ ਨੇ ਇਹ ਵੀ ਪਾਇਆ ਕਿ ਨਿਗਰਾਨੀ ਕੈਮਰਿਆਂ ਨੇ 26 ਮਾਰਚ ਤੋਂ ਰਿਕਾਰਡਿੰਗ ਦੁਬਾਰਾ ਸ਼ੁਰੂ ਕਰ ਦਿੱਤੀ ਹੈ। ਉਸ ਤਰੀਕ ਤੋਂ ਬਾਅਦ ਦਰਜ ਕੀਤੀ ਗਈ ਫੁਟੇਜ ਵਿਚ ਪੀਲੀਭੀਤ ਦੇ ਬਾਧਪੁਰਾ ਗੁਰਦੁਆਰੇ ਦੇ ਮੁਖੀ ਜਥੇਦਾਰ ਮੋਹਨ ਸਿੰਘ ਦੇ ਨਾਂ ‘ਤੇ ਰਜਿਸਟਰਡ ਉੱਤਰਾਖੰਡ ਨੰਬਰ ਪਲੇਟਾਂ ਵਾਲੀ ਇਕ ਗੱਡੀ ਦਿਖਾਈ ਦਿੱਤੀ। ਗੱਡੀ ਗੁਰਦੁਆਰਾ ਸਾਹਿਬ ਦੇ ਅੰਦਰ ਖੜ੍ਹੀ ਸੀ।
