ਨੈਸ਼ਨਲ| ਇਨ੍ਹੀਂ ਦਿਨੀਂ ਦੇਸ਼ ਭਰ ‘ਚ ਵਿਆਹਾਂ ਦਾ ਸੀਜ਼ਨ ਚੱਲ ਰਿਹਾ ਹੈ। ਹਰ ਰੋਜ਼ ਕਈ ਜੋੜੇ ਵਿਆਹ ਦੇ ਬੰਧਨ ‘ਚ ਬੱਝ ਕੇ ਜ਼ਿੰਦਗੀ ਦੀ ਨਵੀਂ ਪਾਰੀ ਦੀ ਸ਼ੁਰੂਆਤ ਕਰ ਰਹੇ ਹਨ, ਉਥੇ ਹੀ ਕਈ ਵਿਆਹ ਵੀ ਕਿਸੇ ਨਾ ਕਿਸੇ ਕਾਰਨ ਸੁਰਖੀਆਂ ‘ਚ ਆ ਰਹੇ ਹਨ।
ਅਜਿਹਾ ਹੀ ਇੱਕ ਮਾਮਲਾ ਯੂਪੀ ਤੋਂ ਵੀ ਸਾਹਮਣੇ ਆਇਆ ਹੈ ਜਿੱਥੇ ਲਾੜੇ ਦਾ ਰੰਗ ਦੇਖ ਕੇ ਹੀ ਵਿਆਹ ਰੱਦ ਕਰ ਦਿੱਤਾ ਗਿਆ ਅਤੇ ਬਰਾਤ ਨੂੰ ਖਾਲੀ ਹੱਥ ਪਰਤਣਾ ਪਿਆ। ਮਾਮਲਾ ਯੂਪੀ ਦੇ ਮਹਾਰਾਜਗੰਜ ਜ਼ਿਲੇ ਦਾ ਹੈ, ਜਿੱਥੇ ਲਾੜੇ ਦਾ ਕਾਲਾ ਰੰਗ ਦੇਖ ਕੇ ਲਾੜੀ ਗੁੱਸੇ ‘ਚ ਆ ਗਈ ਅਤੇ ਬਾਰਾਤ ਵਾਪਸ ਮੁੜਨੀ ਪਈ। ਲਾੜੀ ਇੰਨੀ ਨਾਰਾਜ਼ ਹੋ ਗਈ ਕਿ ਲਾੜੇ ਨੂੰ ਦੇਖ ਕੇ ਉਹ ਸਟੇਜ ਤੋਂ ਹੇਠਾਂ ਉਤਰ ਕੇ ਰੋਂਦੀ ਹੋਈ ਆਪਣੇ ਘਰ ਚਲੀ ਗਈ ਅਤੇ ਵਾਪਸ ਨਹੀਂ ਪਰਤੀ।
ਆਖ਼ਰਕਾਰ ਬਾਰਾਤ ਵਾਪਸ ਪਰਤੀ ਜਦੋਂ ਕਿ ਲਾੜੇ ਅਤੇ ਹੋਰਾਂ ਨੂੰ ਪੁਲਿਸ ਚੌਕੀ ਲਿਜਾਇਆ ਗਿਆ। ਇਹ ਘਟਨਾ ਮਹਾਰਾਜਗੰਜ ਜ਼ਿਲ੍ਹੇ ਦੇ ਪਨਿਆਰਾ ਥਾਣਾ ਖੇਤਰ ਦੇ ਇੱਕ ਪਿੰਡ ਦੀ ਹੈ। ਬਰਾਤ ਪਹੁੰਚਣ ਤੱਕ ਸਭ ਕੁਝ ਠੀਕ ਸੀ। ਰਸਮਾਂ ਪੂਰੀਆਂ ਕੀਤੀਆਂ ਜਾ ਰਹੀਆਂ ਸਨ ਪਰ ਇਸ ਤੋਂ ਬਾਅਦ ਜੈਮਾਲਾ ਮੌਕੇ ਸਟੇਜ ‘ਤੇ ਲਾੜੇ ਦਾ ਰੰਗ ਦੇਖ ਕੇ ਲਾੜੀ ਗੁੱਸੇ ‘ਚ ਆ ਗਈ ਅਤੇ ਵਿਆਹ ਤੋਂ ਇਨਕਾਰ ਕਰ ਦਿੱਤਾ। ਲਾੜੀ ਦੇ ਸਖ਼ਤ ਸਟੈਂਡ ਤੋਂ ਬਾਅਦ ਹੰਗਾਮਾ ਹੋ ਗਿਆ। ਪਰਿਵਾਰਕ ਮੈਂਬਰਾਂ ਅਤੇ ਰਿਸ਼ਤੇਦਾਰਾਂ ਨੇ ਲਾੜੀ ਨੂੰ ਮਨਾਉਣ ਦੀ ਹਰ ਸੰਭਵ ਕੋਸ਼ਿਸ਼ ਕੀਤੀ ਪਰ ਉਹ ਤਿਆਰ ਨਹੀਂ ਹੋਈ।
ਘਟਨਾ ਵੀਰਵਾਰ ਦੀ ਹੈ। ਰਾਤ ਨੂੰ ਬਰਾਤ ਬੜੀ ਧੂਮ-ਧਾਮ ਨਾਲ ਪਿੰਡ ਪਹੁੰਚੀ। ਬਾਰਾਤੀਆਂ ਦਾ ਸਵਾਗਤ ਕਰਨ ਤੋਂ ਬਾਅਦ ਨਾਸ਼ਤਾ ਅਤੇ ਭੋਜਨ ਦੇਣ ਦਾ ਦੌਰ ਸ਼ੁਰੂ ਹੋਇਆ। ਜਾਣ-ਪਛਾਣ ਅਤੇ ਪਰਾਹੁਣਚਾਰੀ ਵਿਚਕਾਰ ਜੈਮਾਲਾ ਦਾ ਪ੍ਰੋਗਰਾਮ ਸ਼ੁਰੂ ਹੋਇਆ। ਪਹਿਲਾਂ ਲਾੜਾ ਮੰਡਪ ‘ਚ ਬੈਠਿਆ ਅਤੇ ਫਿਰ ਬਾਅਦ ‘ਚ ਲਾੜੀ ਨੂੰ ਲਿਆਂਦਾ ਗਿਆ ਪਰ ਜਿਵੇਂ ਹੀ ਲਾੜੀ ਨੇ ਲਾੜੇ ਦਾ ਚਿਹਰਾ ਦੇਖਿਆ ਤਾਂ ਉਹ ਤੁਰੰਤ ਮੰਡਪ ਤੋਂ ਉੱਠ ਕੇ ਰੋਂਦੀ ਹੋਈ ਘਰ ਚਲੀ ਗਈ ਅਤੇ ਵਿਆਹ ਤੋਂ ਇਨਕਾਰ ਕਰ ਦਿੱਤਾ। ਦੱਸਿਆ ਜਾ ਰਿਹਾ ਹੈ ਕਿ ਲਾੜੇ ਦਾ ਰੰਗ ਕਾਲਾ ਅਤੇ ਉਮਰ ਵੀ ਜ਼ਿਆਦਾ ਸੀ।
ਮਾਮਲਾ ਵਿਗੜਦਾ ਦੇਖ ਪਿੰਡ ਦੇ ਪਤਵੰਤੇ ਸੱਜਣਾਂ ਵਿੱਚ ਗੱਲਬਾਤ ਸ਼ੁਰੂ ਹੋ ਗਈ। ਕਾਫੀ ਗੱਲਬਾਤ ਹੋਈ ਪਰ ਗੱਲ ਸਿਰੇ ਨਹੀਂ ਚੜ੍ਹੀ। ਇਸ ਤੋਂ ਬਾਅਦ ਰਿਸ਼ਤੇਦਾਰਾਂ ਨੇ ਪੁਲਿਸ ਨੂੰ ਸੂਚਨਾ ਦਿੱਤੀ। ਪੁਲਿਸ ਨੇ ਲਾੜੇ ਤੇ ਹੋਰਾਂ ਪ੍ਰਮੁੱਖ ਵਿਅਕਤੀਆਂ ਨੂੰ ਚੌਕੀ ਲਿਆਂਦਾ ਪਰ ਵਿਆਹ ਨਹੀਂ ਹੋਇਆ। ਪੁਲਿਸ ਦਾ ਕਹਿਣਾ ਹੈ ਕਿ ਲੜਕੀ ਨੇ ਵਿਆਹ ਕਰਨ ਤੋਂ ਇਨਕਾਰ ਕਰ ਦਿੱਤਾ, ਕਿਸੇ ਨੇ ਵੀ ਕਾਰਵਾਈ ਲਈ ਸ਼ਿਕਾਇਤ ਨਹੀਂ ਦਿੱਤੀ।
