ਲੁਧਿਆਣਾ | ਇਥੋਂ ਲੁੱਟ ਦੀ ਵਾਰਦਾਤ ਸਾਹਮਣੇ ਆਈ ਹੈ। ਪੰਜਾਬੀ ਸਿੰਗਰ ਨੂੰ ਨਿਸ਼ਾਨਾ ਬਣਾਉਂਦਿਆਂ 6 ਬਦਮਾਸ਼ਾਂ ਨੇ ਉਸ ਦੀ ਗਰਦਨ ‘ਤੇ ਤਲਵਾਰ ਰੱਖੀ ਅਤੇ ਸੋਨੇ ਦੀ ਮੁੰਦਰੀ, ਕੜਾ, 15 ਹਜ਼ਾਰ ਦੀ ਨਕਦੀ ਅਤੇ ਆਈਫੋਨ ਲੁੱਟ ਲਿਆ। ਥਾਣਾ ਮੋਤੀ ਨਗਰ ਦੀ ਪੁਲਿਸ ਨੇ ਨੰਦਾ ਕਾਲੋਨੀ ਦੇ ਰਹਿਣ ਵਾਲੇ ਪੰਜਾਬੀ ਗਾਇਕ ਮਾਨਿਕ ਜੈਨ ਦੇ ਬਿਆਨ ਉਪਰ ਅਣਪਛਾਤੇ ਬਦਮਾਸ਼ਾਂ ਖ਼ਿਲਾਫ਼ ਮੁਕਦਮਾ ਦਰਜ ਕਰ ਲਿਆ ਹੈ। ਮਾਨਿਕ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਕੁਝ ਦਿਨ ਪਹਿਲਾਂ ਉਹ ਢੰਡਾਰੀ ਇਲਾਕੇ ਦੇ ਇੱਕ ਸਟੂਡੀਓ ‘ਚੋਂ ਗੀਤ ਦੀ ਰਿਕਾਰਡਿੰਗ ਕਰਵਾ ਕੇ ਆਪਣੇ ਭਰਾ ਨਾਲ ਰਾਤ 2 ਵਜੇ ਘਰ ਵਾਪਸ ਆ ਰਿਹਾ ਸੀ।
ਜਿਵੇਂ ਹੀ ਉਹ ਸ਼ਿਵ ਚੌਕ ਦੇ ਕੋਲ ਪਹੁੰਚੇ ਤਾਂ ਰੌਂਗ ਸਾਈਡ ਤੋਂ ਆ ਰਹੇ ਮੋਟਰਸਾਈਕਲ ਸਵਾਰ 6 ਨੌਜਵਾਨਾਂ ਨੇ ਉਨ੍ਹਾਂ ਨੂੰ ਘੇਰ ਲਿਆ । ਮਾਨਿਕ ਨੇ ਦੱਸਿਆ ਕਿ ਬਦਮਾਸ਼ਾਂ ਨੇ ਉਸ ਦੇ ਸਿਰ ਵਿਚ ਡੰਡੇ ਨਾਲ ਸੱਟ ਮਾਰੀ ਅਤੇ ਗਰਦਨ ‘ਤੇ ਤਲਵਾਰ ਰੱਖ ਦਿੱਤੀ। ਬਦਮਾਸ਼ਾਂ ਨੇ ਮਾਨਿਕ ਦੇ ਐਕਟਿਵਾ ਸਕੂਟਰ ਦੀ ਚਾਬੀ ਕੱਢਣ ਤੋਂ ਬਾਅਦ ਉਸਦਾ ਆਈਫੋਨ, ਕੜਾ, ਸੋਨੇ ਦੀ ਮੁੰਦਰੀ ਅਤੇ 15 ਹਜ਼ਾਰ ਰੁਪਏ ਲੁੱਟ ਲਏ।
ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਬਾਅਦ ਬਦਮਾਸ਼ ਮੌਕੇ ਤੋਂ ਫਰਾਰ ਹੋ ਗਏ। ਉਧਰੋਂ ਇਸ ਮਾਮਲੇ ਵਿੱਚ ਜਾਂਚ ਅਧਿਕਾਰੀ ਸਾਹਿਬ ਸਿੰਘ ਦਾ ਕਹਿਣਾ ਹੈ ਕਿ ਪੁਲਿਸ ਨੇ ਅਣਪਛਾਤੇ 6 ਬਦਮਾਸ਼ਾਂ ਖਿਲਾਫ ਐਫਆਈਆਰ ਦਰਜ ਕਰਕੇ ਪੜਤਾਲ ਸ਼ੁਰੂ ਕਰ ਦਿੱਤੀ ਹੈ।
