ਜਲੰਧਰ | ਪੰਜਾਬ ਵਿਚ ਮੌਨਸੂਨ ਮੱਠੀ ਰਫ਼ਤਾਰ ਨਾਲ ਜਾਰੀ ਹੈ। 9 ਸਤੰਬਰ ਯਾਨੀ ਸੋਢਲ ਦੇ ਮੇਲੇ ਤੱਕ ਤਿੰਨ ਦਿਨ ਮੌਸਮੀ ਹਲਚਲ ਰਹੇਗੀ। ਜਲੰਧਰ ‘ਚ ਵੱਖ-ਵੱਖ ਇਲਾਕਿਆਂ ‘ਚ ਬਾਰਿਸ਼ ਪੈਣ ਦੀ ਸੰਭਾਵਨਾ ਹੈ। ਮਾਨਸੂਨ ਦੇ ਕਮਜ਼ੋਰ ਹੋਣ ਦੇ ਵਿਚਕਾਰ ਹਵਾ ਦਾ ਘੱਟ ਦਬਾਅ ਵਾਲਾ ਖੇਤਰ ਬਣ ਗਿਆ ਹੈ, ਜਿਸ ਕਾਰਨ ਇਹ ਬੂੰਦਾ-ਬਾਂਦੀ ਸੰਭਵ ਹੈ। ਇਸ ਦੌਰਾਨ ਜਲੰਧਰ ਦਾ ਆਮ ਤਾਪਮਾਨ 35 ਡਿਗਰੀ ਤੇ ਰਾਤ ਨੂੰ 27 ਡਿਗਰੀ ਦੇ ਆਸ-ਪਾਸ ਰਹੇਗਾ। ਬੱਦਲ ਛਾਏ ਰਹਿਣਗੇ ਤੇ ਤੇਜ਼ ਹਵਾਵਾਂ ਚੱਲਣਗੀਆਂ।
ਇਸ ਦੌਰਾਨ ਮੰਗਲਵਾਰ ਸ਼ਾਮ ਨੂੰ ਅੱਧਾ ਘੰਟਾ ਮੀਂਹ ਪਿਆ। ਦੋਆਬਾ ਚੌਕ, ਇੰਡਸਟਰੀਅਲ ਏਰੀਆ ਤੋਂ ਲੈ ਕੇ ਲਾਡੋਵਾਲੀ ਰੋਡ, ਡੀਸੀ ਕੰਪਲੈਕਸ ਤੱਕ ਮੀਂਹ ਪਿਆ। ਹੁਣ ਤੱਕ ਜਲੰਧਰ ‘ਚ 293.6 ਮਿਲੀਮੀਟਰ ਬਾਰਿਸ਼ ਹੋ ਚੁੱਕੀ ਹੈ ਪਰ ਹੁਣ ਤੱਕ ਪੂਰੇ ਮਾਨਸੂਨ ਸੀਜ਼ਨ ‘ਚ ਜਲੰਧਰ ‘ਚ 460.1 ਮਿਲੀਮੀਟਰ ਬਾਰਿਸ਼ ਹੋਣੀ ਚਾਹੀਦੀ ਸੀ। ਚੰਡੀਗੜ੍ਹ ਮੌਸਮ ਵਿਗਿਆਨ ਕੇਂਦਰ ਮੁਤਾਬਕ ਸਤੰਬਰ ਦੇ ਪੂਰੇ ਮਹੀਨੇ ਤੱਕ ਮਾਨਸੂਨ ਸਰਗਰਮ ਰਹੇਗਾ।
