ਦਿੱਲੀ| ਰਾਜਧਾਨੀ ਦਾ ਬੰਗਲਾ ਸਾਹਿਬ ਗੁਰਦੁਆਰਾ ਸਿਰਫ਼ ਆਸਥਾ ਲਈ ਹੀ ਨਹੀਂ, ਸਗੋਂ ਨੇਕ ਕੰਮਾਂ ਲਈ ਵੀ ਜਾਣਿਆ ਜਾਂਦਾ ਹੈ। ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਗਰੀਬਾਂ ਦੀਆਂ ਸਿਹਤ ਸਬੰਧੀ ਲੋੜਾਂ ਨੂੰ ਪੂਰਾ ਕਰਨ ਲਈ ਗੁਰਦੁਆਰੇ ਦੀ ਡਿਸਪੈਂਸਰੀ ਵਿੱਚ ਕਾਰਡੀਓਲੋਜੀ ਯੂਨਿਟ ਸ਼ੁਰੂ ਕੀਤਾ ਜਾਵੇਗਾ, ਜਿਸ ਦੀਆਂ ਤਿਆਰੀਆਂ ਜ਼ੋਰਾਂ ’ਤੇ ਹਨ।
ਦੱਸ ਦਈਏ ਕਿ ਗੁਰੂ ਹਰਿਕ੍ਰਿਸ਼ਨ ਪੋਲੀਕਲੀਨਿਕ ਵਿੱਚ ਲੋਕਾਂ ਨੂੰ ਪਹਿਲਾਂ ਹੀ ਸਿਹਤ ਸਬੰਧੀ ਬਹੁਤ ਸਾਰੀਆਂ ਸਹੂਲਤਾਂ ਮਿਲਦੀਆਂ ਹਨ। ਇੱਥੇ ਜਿਨ੍ਹਾਂ ਟੈਸਟਾਂ ਦਾ ਖਰਚ ਹਜ਼ਾਰਾਂ ਵਿੱਚ ਹੁੰਦਾ ਹੈ, ਉਹ ਵੀ 50-300 ਰੁਪਏ ਵਿੱਚ ਹੋ ਜਾਂਦਾ ਹੈ। ਇੱਥੇ MRI ਵੀ ਸਿਰਫ 50 ਰੁਪਏ ਵਿੱਚ ਕੀਤਾ ਜਾਂਦਾ ਹੈ। ਆਉਣ ਵਾਲੇ ਦਿਨਾਂ ਵਿੱਚ ਗੁਰਦੁਆਰਾ ਸਾਹਿਬ ਵੱਲੋਂ ਇੱਕ ਹੋਰ ਉਪਰਾਲਾ ਕੀਤਾ ਜਾ ਰਿਹਾ ਹੈ। ਜਿਹੜੇ ਗਰੀਬ ਵਰਗ ਨਾਲ ਸਬੰਧਤ ਹਨ, ਉਹ ਵੀ ਆਪਣੇ ਦਿਲ ਦਾ ਇਲਾਜ ਕਰਵਾ ਸਕਣਗੇ ਕਿਉਂਕਿ ਇੱਥੇ ਇੱਕ ਨਵੀਂ ਕਾਰਡੀਓ ਯੂਨਿਟ ਬਣਨ ਜਾ ਰਹੀ ਹੈ, ਜਿਸ ਵਿੱਚ ਈਸੀਜੀ, TMT ਵਰਗੇ ਟੈਸਟ ਬਹੁਤ ਘੱਟ ਪੈਸੇ ਵਿੱਚ ਕੀਤੇ ਜਾਣਗੇ।
