ਗੁਰਦਾਸਪੁਰ| ਘੁਮਾਣ ਦੇ ਪੁਰਾਣੇ ਥਾਣੇ ਦੀ ਇਮਾਰਤ ਦੇ ਨਾਲ ਲੱਗਦੇ ਡਾਕਖਾਨੇ ਦੀ ਤਿਜੋਰੀ ਨੂੰ ਚੋਰ ਵੱਲੋਂ ਵੈਲਡਿੰਗ ਮਸ਼ੀਨ ਨਾਲ ਕੱਟਣ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਤਿਜੋਰੀ ਨਾ ਖੋਲ੍ਹਣ ਤੋਂ ਗੁੱਸੇ ਵਿੱਚ ਆਏ ਚੋਰ ਨੇ ਤਿਜੋਰੀ ਨੂੰ ਹੀ ਵੈਲਡਿੰਗ ਕਰ ਦਿੱਤਾ। ਜਿਸ ਨੂੰ ਬਾਅਦ ਵਿੱਚ ਸਟਾਫ਼ ਵੱਲੋਂ ਕਟਰ ਨਾਲ ਕੱਟ ਕੇ ਖੋਲ੍ਹਿਆ ਗਿਆ।
ਸਬ ਪੋਸਟ ਮਾਸਟਰ ਸੰਜੀਵ ਕੁਮਾਰ ਸ਼ਰਮਾ ਨੇ ਦੱਸਿਆ ਕਿ ਸ਼ਨੀਵਾਰ ਨੂੰ ਉਹ ਸਮੇਂ ਸਿਰ ਡਾਕਖਾਨਾ ਬੰਦ ਕਰਕੇ ਐਤਵਾਰ ਛੁੱਟੀ ਹੋਣ ਕਾਰਨ ਚਲੇ ਗਏ ਸਨ। ਸੋਮਵਾਰ ਨੂੰ ਜਦੋਂ ਉਹ ਸਟਾਫ਼ ਸਮੇਤ ਡਾਕਖਾਨੇ ਪੁੱਜੇ ਤਾਂ ਦੇਖਿਆ ਕਿ ਦਫ਼ਤਰ ਵਿੱਚ ਸਾਮਾਨ ਖਿੱਲਰਿਆ ਪਿਆ ਸੀ। ਜਦੋਂ ਸਟਾਫ ਸਟੋਰ ਰੂਮ ਵਿੱਚ ਗਿਆ ਤਾਂ ਦੇਖਿਆ ਕਿ ਡਾਕਖਾਨੇ ਦੇ ਨਾਲ ਲੱਗਦੇ ਪੁਰਾਣੇ ਥਾਣੇ ਦੀ ਇਮਾਰਤ ਦੀ ਸਾਈਡ ਦੀ ਕੰਧ ਟੁੱਟੀ ਹੋਈ ਸੀ।
ਉਨ੍ਹਾਂ ਨੇ ਦੱਸਿਆ ਕਿ ਚੋਰ ਨੇ ਕੰਧ ਤੋੜ ਕੇ ਡਾਕਖਾਨੇ ਵਿੱਚ ਦਾਖਲ ਹੋ ਕੇ ਸਟੋਰ ਰੂਮ ਵਿੱਚ ਰੱਖੀ ਸੇਫ਼ ਨੂੰ ਵੈਲਡਿੰਗ ਮਸ਼ੀਨ ਨਾਲ ਕੱਟਣ ਦੀ ਕੋਸ਼ਿਸ਼ ਕੀਤੀ ਪਰ ਸੇਫ਼ ਨੂੰ ਨਾ ਕੱਟ ਸਕਿਆ ਅਤੇ ਗੁੱਸੇ ਵਿੱਚ ਆ ਗਿਆ ਅਤੇ ਸੇਫ਼ ਨੂੰ ਵੈਲਡਿੰਗ ਕਰ ਦਿੱਤਾ। ਉਸ ਨੇ ਦੱਸਿਆ ਕਿ ਸੇਫ ਵਿੱਚ 3 ਲੱਖ 85 ਹਜ਼ਾਰ ਰੁਪਏ ਸਨ, ਜੋ ਚੋਰੀ ਹੋਣ ਤੋਂ ਬਚ ਗਏ।
ਇਸ ਤੋਂ ਬਾਅਦ ਮਕੈਨਿਕ ਨੂੰ ਬੁਲਾਇਆ ਗਿਆ ਅਤੇ ਕਟਰ ਨਾਲ ਸੇਫ ਨੂੰ ਖੋਲ੍ਹਿਆ ਗਿਆ। ਥਾਣਾ ਘੁਮਾਣ ਦੇ ਵਧੀਕ ਐਸਐਚਓ ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਫਿੰਗਰ ਪ੍ਰਿੰਟ ਲਏ ਗਏ ਹਨ। ਜਾਂਚ ਜਾਰੀ ਹੈ।
