ਨਵੀਂ ਦਿੱਲੀ, 9 ਫਰਵਰੀ | ਟੀ-20 ਵਿਸ਼ਵ ਕੱਪ 2026 ਵਿੱਚ 15 ਫਰਵਰੀ ਨੂੰ ਕੋਲੰਬੋ ਵਿਖੇ ਹੋਣ ਵਾਲੇ ਭਾਰਤ-ਪਾਕਿਸਤਾਨ ਮੈਚ ‘ਤੇ ਅਨਿਸ਼ਚਿਤਤਾ ਦੇ ਬੱਦਲ ਛਾ ਗਏ ਹਨ। ਇਸ ਹਾਈ-ਵੋਲਟੇਜ ਮੁਕਾਬਲੇ ਨੂੰ ਬਚਾਉਣ ਲਈ ਲਾਹੌਰ ਵਿੱਚ ਆਈਸੀਸੀ (ICC) ਅਤੇ ਪਾਕਿਸਤਾਨ ਕ੍ਰਿਕਟ ਬੋਰਡ (PCB) ਵਿਚਕਾਰ ਦੇਰ ਰਾਤ ਅਹਿਮ ਮੀਟਿੰਗ ਹੋਈ। ਮੰਨਿਆ ਜਾ ਰਿਹਾ ਹੈ ਕਿ ਅਗਲੇ 24 ਤੋਂ 48 ਘੰਟਿਆਂ ਵਿੱਚ ਇਸ ਮੈਚ ਦੇ ਭਵਿੱਖ ਬਾਰੇ ਕੋਈ ਵੱਡਾ ਫੈਸਲਾ ਆ ਸਕਦਾ ਹੈ।
ਪਾਕਿਸਤਾਨ ਨੇ ਮੈਚ ਖੇਡਣ ਲਈ ਆਈਸੀਸੀ ਅੱਗੇ ਤਿੰਨ ਮੁੱਖ ਸ਼ਰਤਾਂ ਰੱਖੀਆਂ ਹਨ:
-
ਆਈਸੀਸੀ ਦੀ ਕਮਾਈ (Revenue) ਵਿੱਚੋਂ ਪਾਕਿਸਤਾਨ ਦਾ ਹਿੱਸਾ ਵਧਾਇਆ ਜਾਵੇ।
-
ਭਾਰਤ ਨਾਲ ਰੁਕੀ ਹੋਈ ਦੁਵੱਲੀ ਸੀਰੀਜ਼ ਮੁੜ ਸ਼ੁਰੂ ਕੀਤੀ ਜਾਵੇ।
-
ਮੈਚ ਤੋਂ ਬਾਅਦ ਖਿਡਾਰੀਆਂ ਦੇ ਆਪਸ ਵਿੱਚ ਹੱਥ ਮਿਲਾਉਣ (Handshake Protocol) ਦੀ ਸਖ਼ਤੀ ਨਾਲ ਪਾਲਣਾ ਹੋਵੇ।
ਵਿਵਾਦ ਦੀ ਜੜ੍ਹ ਬੰਗਲਾਦੇਸ਼ ਵੱਲੋਂ ਸੁਰੱਖਿਆ ਕਾਰਨਾਂ ਕਰਕੇ ਭਾਰਤ ਵਿੱਚ ਖੇਡਣ ਤੋਂ ਇਨਕਾਰ ਕਰਨਾ ਹੈ, ਜਿਸ ਦੇ ਸਮਰਥਨ ਵਿੱਚ ਹੁਣ ਪਾਕਿਸਤਾਨ ਉੱਤਰ ਆਇਆ ਹੈ। ਦੂਜੇ ਪਾਸੇ, ਮੇਜ਼ਬਾਨ ਸ਼੍ਰੀਲੰਕਾ ਨੇ ਇਸ ਬਾਈਕਾਟ ਦੀ ਧਮਕੀ ‘ਤੇ ਸਖ਼ਤ ਨਾਰਾਜ਼ਗੀ ਜਤਾਈ ਹੈ। ਸ਼੍ਰੀਲੰਕਾ ਦਾ ਕਹਿਣਾ ਹੈ ਕਿ ਜੇਕਰ ਇਹ ਮੈਚ ਰੱਦ ਹੁੰਦਾ ਹੈ, ਤਾਂ ਉਨ੍ਹਾਂ ਦੇ ਸੈਰ-ਸਪਾਟਾ ਅਤੇ ਹੋਟਲ ਉਦਯੋਗ ਨੂੰ ਭਾਰੀ ਵਿੱਤੀ ਨੁਕਸਾਨ ਝੱਲਣਾ ਪਵੇਗਾ। ਬੀਸੀਸੀਆਈ (BCCI) ਨੇ ਫਿਲਹਾਲ ਇਸ ਮਾਮਲੇ ‘ਤੇ ਚੁੱਪੀ ਧਾਰੀ ਹੋਈ ਹੈ ਅਤੇ ਸਾਰਾ ਫੈਸਲਾ ਆਈਸੀਸੀ ‘ਤੇ ਛੱਡ ਦਿੱਤਾ ਹੈ।
