ਸਿਰਸਾ| ਸਾਧਵੀਆਂ ਦੇ ਜਿਨਸੀ ਸ਼ੋਸ਼ਣ ਅਤੇ ਹੱਤਿਆ ਦੇ ਮਾਮਲੇ ‘ਚ ਸਜ਼ਾ ਕੱਟ ਰਹੇ ਰਾਮ ਰਹੀਮ ਦਾ ਅੱਜ 56ਵਾਂ ਜਨਮ ਦਿਨ ਹੈ। 6 ਸਾਲ ਬਾਅਦ ਇਹ ਪਹਿਲਾ ਮੌਕਾ ਹੈ, ਜਦੋਂ ਰਾਮ ਰਹੀਮ ਜੇਲ੍ਹ ਦੇ ਬਾਹਰ ਆਪਣਾ ਜਨਮ ਦਿਨ ਮਨਾਏਗਾ। ਸਾਧਵੀ ਜਿਨਸੀ ਸ਼ੋਸ਼ਣ ਮਾਮਲੇ ਵਿੱਚ ਰਾਮ ਰਹੀਮ ਨੂੰ ਪਹਿਲੀ ਵਾਰ 25 ਅਗਸਤ 2017 ਨੂੰ ਦੋਸ਼ੀ ਠਹਿਰਾਇਆ ਗਿਆ ਸੀ। ਜਿਸ ਤੋਂ ਬਾਅਦ ਉਸ ਨੂੰ ਸੁਨਾਰੀਆ ਜੇਲ੍ਹ ਵਿੱਚ ਰੱਖਿਆ ਗਿਆ ਹੈ। ਇਸ ਤੋਂ ਬਾਅਦ ਪੱਤਰਕਾਰ ਛਤਰਪਤੀ ਅਤੇ ਰਣਜੀਤ ਦੇ ਕਤਲ ਕੇਸ ਵਿੱਚ ਦੋਸ਼ੀ ਕਰਾਰ ਦਿੱਤਾ ਗਿਆ ਸੀ।
ਰਾਮ ਰਹੀਮ ਇਸ ਵਾਰ 20 ਜੁਲਾਈ ਨੂੰ ਜੇਲ੍ਹ ਤੋਂ ਬਾਹਰ ਆਇਆ ਹੈ। ਉਸ ਦੀ ਪੈਰੋਲ ਦੀ ਮਿਆਦ 20 ਅਗਸਤ ਨੂੰ ਖਤਮ ਹੋਵੇਗੀ। 25 ਅਗਸਤ 2023 ਨੂੰ ਉਸਦੀ ਸਜ਼ਾ ਦੇ 6 ਸਾਲ ਪੂਰੇ ਹੋ ਜਾਣਗੇ।
ਰਾਮ ਰਹੀਮ ਬਰਨਾਵਾ ਡੇਰੇ ਤੋਂ ਪ੍ਰਚਾਰ ਕਰੇਗਾ
ਰਾਮ ਰਹੀਮ ਆਪਣੇ ਜਨਮ ਦਿਨ ‘ਤੇ ਉੱਤਰ ਪ੍ਰਦੇਸ਼ (ਯੂਪੀ) ਦੇ ਬਰਨਾਵਾ ਆਸ਼ਰਮ ‘ਚ ਭਾਸ਼ਣ ਦੇਣਗੇ। ਪਹਿਲੀ ਵਾਰ ਸਿਰਸਾ ਡੇਰੇ ਵਿੱਚ ਸ਼ਾਮ 5 ਵਜੇ ਤੋਂ ਲੈ ਕੇ ਰਾਤ ਤੱਕ ਪ੍ਰੋਗਰਾਮ ਹੋਣਗੇ। ਇਸ ਦੇ ਲਈ ਸਿਰਸਾ ਡੇਰੇ ਵਿਖੇ ਵਿਸ਼ੇਸ਼ ਪ੍ਰਬੰਧ ਕੀਤੇ ਗਏ ਹਨ। ਬਰਨਾਵਾ ਤੋਂ ਰਾਮ ਰਹੀਮ ਜ਼ੂਮ ਰਾਹੀਂ ਸਤਿਸੰਗ ਕਰਨਗੇ। ਹਰਿਆਣਾ ਦੇ ਪ੍ਰੇਮੀਆਂ ਨੂੰ ਸਿਰਸਾ ਡੇਰੇ ਵਿੱਚ ਬੁਲਾਇਆ ਗਿਆ ਹੈ। ਇਸ ਤੋਂ ਇਲਾਵਾ ਰਾਜਸਥਾਨ ਦੇ ਬੀਕਾਨੇਰ, ਕੋਟਾ ਅਤੇ ਜੈਪੁਰ ਦੇ ਡੇਰਿਆਂ ‘ਚ ਰਾਮ ਰਹੀਮ ਦੇ ਭਾਸ਼ਣ ਦਾ ਸਿੱਧਾ ਪ੍ਰਸਾਰਣ ਹੋਵੇਗਾ।
