ਰਾਜਸਥਾਨ | ਇਥੋਂ ਮੰਦਭਾਗੀ ਖਬਰ ਸਾਹਮਣੇ ਆਈ ਹੈ। ਰਾਜਸਥਾਨ ਦੇ ਕੋਟਾ ਵਿਚ ਟੋਭੇ ਵਿਚ ਡੁੱਬਣ ਕਾਰਨ 2 ਲੜਕਿਆਂ ਦੀ ਮੌਤ ਹੋ ਗਈ। ਦੋਵੇਂ ਮੱਝਾਂ ਨੂੰ ਪਾਣੀ ਪਿਆਉਣ ਲਈ ਡੂੰਘੇ ਟੋਭੇ ‘ਚ ਗਏ ਹੋਏ ਸਨ। ਇਸ ਦੌਰਾਨ ਇਕ ਲੜਕਾ ਡੁੱਬਣ ਲੱਗਾ ਅਤੇ ਦੂਜਾ ਉਸ ਨੂੰ ਬਚਾਉਣ ਲਈ ਆਇਆ। ਦੋਵੇਂ ਡੁੱਬ ਗਏ। ਘਟਨਾ ਰਾਨਪੁਰ ਥਾਣਾ ਖੇਤਰ ਦੇ ਇਕ ਬੰਦ ਪਏ ਟੋਭੇ ਦੀ ਹੈ।
ਦਰਅਸਲ, ਹੰਸਰਾਜ ਗੁਰਜਰ (15) ਅਤੇ ਸ਼ੈਤਾਨ ਗੁਰਜਰ (14) ਸ਼ੁੱਕਰਵਾਰ ਦੁਪਹਿਰ ਨੂੰ ਮੱਝਾਂ ਚਾਰਨ ਲਈ ਦੇਵਨਾਰਾਇਣ ਰਿਹਾਇਸ਼ੀ ਸਕੀਮ ਨੇੜੇ ਡੂੰਘੇ ਟੋਭੇ ਵਿਚ ਗਏ ਸਨ। ਇਹ ਟੋਭਾ ਪਾਣੀ ਨਾਲ ਭਰਿਆ ਹੋਇਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਕ ਲੜਕਾ ਮੱਝ ਸਮੇਤ ਟੋਭੇ ਵਿਚ ਵੜ ਗਿਆ। ਜਦੋਂ ਉਹ ਡੁੱਬਣ ਲੱਗਾ ਤਾਂ ਦੂਜਾ ਉਸ ਨੂੰ ਬਚਾਉਣ ਲਈ ਉਤਰਿਆ। ਦੋਵੇਂ ਬਾਹਰ ਨਹੀਂ ਨਿਕਲ ਸਕੇ।
ਸ਼ਾਮ 5.30 ਵਜੇ ਦੇ ਕਰੀਬ ਪਾਣੀ ਦਾ ਟੈਂਕਰ ਭਰਨ ਆਏ ਨੌਜਵਾਨ ਨੇ ਟੋਭੇ ਦੇ ਕੋਲ ਕੱਪੜੇ ਅਤੇ ਚੱਪਲਾਂ ਪਈਆਂ ਦੇਖੀਆਂ। ਉਸ ਨੇ ਹਾਊਸਿੰਗ ਸਕੀਮ ਵਿਚ ਜਾ ਕੇ ਦੱਸਿਆ। ਫਿਰ ਪੁਲਿਸ ਨੂੰ ਸੂਚਨਾ ਦਿੱਤੀ। ਰਾਤ ਕਰੀਬ 8 ਵਜੇ ਨਿਗਮ ਦੀ ਬਚਾਅ ਟੀਮ ਮੌਕੇ ‘ਤੇ ਪਹੁੰਚ ਗਈ। ਦੋਵੇਂ ਲਾਸ਼ਾਂ ਨੂੰ ਸਕੂਬਾ ਡਾਈਵਿੰਗ ਰਾਹੀਂ ਕਰੀਬ 20 ਮਿੰਟਾਂ ਵਿਚ ਬਾਹਰ ਕੱਢ ਲਿਆ ਗਿਆ। ਹੰਸਰਾਜ 5 ਭੈਣ-ਭਰਾਵਾਂ ਵਿਚੋਂ ਇਕਲੌਤਾ ਸੀ। ਉਹ 8ਵੀਂ ਵਿਚ ਪੜ੍ਹਦਾ ਸੀ। ਜਦਕਿ ਦੂਜਾ 6ਵੀਂ ਜਮਾਤ ‘ਚ ਪੜ੍ਹਦਾ ਸੀ।
ਘਟਨਾ ਤੋਂ ਬਾਅਦ ਦੇਵਨਾਰਾਇਣ ਆਵਾਸ ਯੋਜਨਾ ਦੇ ਲੋਕਾਂ ਨੇ ਘਟਨਾ ਲਈ ਯੂਆਈਟੀ ਅਧਿਕਾਰੀਆਂ ਨੂੰ ਜ਼ਿੰਮੇਵਾਰ ਦੱਸਿਆ ਹੈ। ਸ਼ਨੀਵਾਰ ਸਵੇਰੇ ਪੋਸਟਮਾਰਟਮ ਕਰਵਾਉਣ ਤੋਂ ਪਹਿਲਾਂ ਲੋਕਾਂ ਨੇ ਅਧਿਕਾਰੀਆਂ ਖਿਲਾਫ ਕਾਰਵਾਈ ਦੀ ਮੰਗ ਕੀਤੀ। ਇਸ ਦੇ ਨਾਲ ਹੀ ਹਾਊਸਿੰਗ ਸਕੀਮ ਵਿਚ ਪਾਣੀ ਦੀ ਸਮੱਸਿਆ ਨੂੰ ਹੱਲ ਕਰਨ, ਮ੍ਰਿਤਕ ਦੇ ਆਸ਼ਰਿਤਾਂ ਨੂੰ 10-10 ਲੱਖ ਰੁਪਏ ਦੀ ਵਿੱਤੀ ਸਹਾਇਤਾ ਦੇਣ ਦੀ ਮੰਗ ਕੀਤੀ ਗਈ। ਨਿਊ ਮੈਡੀਕਲ ਹਸਪਤਾਲ ਦੇ ਬਾਹਰ ਵੱਡੀ ਗਿਣਤੀ ਵਿਚ ਖੜ੍ਹੇ ਔਰਤਾਂ ਅਤੇ ਮਰਦ ਯੂਆਈਟੀ ਦੇ ਅਧਿਕਾਰੀਆਂ ਨੂੰ ਮੌਕੇ ’ਤੇ ਬੁਲਾਉਣ ਦੀ ਮੰਗ ’ਤੇ ਅੜੇ ਹੋਏ ਹਨ। 3 ਥਾਣਿਆਂ ਦੇ ਸੀਆਈ, ਡੀਐਸਪੀ ਵੀ ਮੌਕੇ ’ਤੇ ਪੁੱਜੇ। ਕਰੀਬ 2 ਘੰਟੇ ਬਾਅਦ ਪ੍ਰਸ਼ਾਸਨ ਦੇ ਭਰੋਸੇ ‘ਤੇ ਪੋਸਟਮਾਰਟਮ ਕਰਵਾਉਣ ਦੀ ਗੱਲ ਮੰਨੀ ਗਈ।
