ਲਖਨਊ| ਬਚਪਨ ਦੀਆਂ ਪੱਕੀਆਂ ਸਹੇਲੀਆਂ ਇਕ ਦੂਜੇ ਨੂੰ ਹੀ ਦਿਲ ਦੇ ਬੈਠੀਆਂ। ਦੋਵੇਂ ਲੜਕੀਆਂ ਦੇ ਪਰਿਵਾਰ ਉਨ੍ਹਾਂ ਦੇ ਵਿਆਹ ਦੀਆਂ ਤਿਆਰੀਆਂ ਵਿਚ ਲੱਗੇ ਹੋਏ ਸਨ। ਇਸ ਦੌਰਾਨ ਰਿਸ਼ਤੇ ਤੋਂ ਇਨਕਾਰ ਕਰਦੇ ਹੋਏ ਦੋਵਾਂ ਨੇ ਇਕ ਦੂਜੇ ਨਾਲ ਹੀ ਰਹਿਣ ਦਾ ਫੈਸਲਾ ਕੀਤਾ। ਉਨ੍ਹਾਂ ਨੇ ਪਰਿਵਾਰ ਦੇ ਸਾਹਮਣੇ ਆਪਣੀ ਇੱਛਾ ਵੀ ਜ਼ਾਹਿਰ ਕੀਤੀ। ਆਪਣੇ ਰਿਸ਼ਤੇ ਨੂੰ ਮੰਜ਼ਿਲ ਉਤੇ ਲੈ ਕੇ ਜਾਣ ਲਈ ਦੋਵਾਂ ਨੇ ਆਪਣਿਆਂ ਨਾਲ ਹੀ ਬਗਾਵਤ ਕਰ ਲਈ।
ਪਿਆਰ ਵਿਚ ਬਦਲੀ ਦੋਵਾਂ ਦੀ ਦੋਸਤੀ : ਸ਼ਨੀਨਵਾਰ ਨੂੰ ਦੋਹਾਂ ਦੇ ਰਿਸ਼ਤੇਦਾਰ ਥਾਣੇ ਪੁੱਜੇ। ਇਥੇ ਦੋਵਾਂ ਲੜਕੀਆਂ ਦੀ ਕੌਂਸਲਿੰਗ ਵੀ ਕੀਤੀ ਗਈ। ਇਸਦੇ ਬਾਵਜੂਦ ਉਹ ਨਹੀਂ ਮੰਨੀਆਂ। ਆਪਣੇ ਆਪ ਨੂੰ ਬਾਲਗ ਦੱਸਦਿਆਂ ਪੁਲਿਸ ਨੂੰ ਦੋਵਾਂ ਨੇ ਆਪਣੇ ਅਧਾਰ ਕਾਰਡ ਵੀ ਦਿਖਾਏ। ਪੁਲਿਸ ਨੇ ਦੋਵਾਂ ਨੂੰ ਇਕੱਠੇ ਰਹਿਣ ਦੀ ਇਜ਼ਾਜਤ ਦਿੱਤੀ।
ਇੰਸਪੈਕਟ ਰਹੀਮਾਬਾਦ ਅਖਤਰ ਅਹਿਮਦ ਅੰਸਾਰੀ ਨੇ ਦੱਸਿਆ ਕਿ ਸ਼ਨੀਵਾਰ ਨੂੰ ਦੋ ਪਰਿਵਾਰ ਥਾਣੇ ਆਏ ਸਨ। ਉਨ੍ਹਾਂ ਨੇ ਆਪਣੀਆਂ ਧੀਆਂ ਦੇ ਵਿਹਾਰ ਬਾਰੇ ਦੱਸਿਆ। ਪਰਿਵਾਰ ਨੇ ਦੱਸਿਆ ਕਿ ਦੋਵੇਂ ਲੜਕੀਆਂ ਇਕੋ ਪਿੰਡ ਵਿਚ ਰਹਿੰਦੀਆਂ ਹਨ। ਦੋਵਾਂ ਵਿਚ ਬਚਪਨ ਤੋਂ ਹੀ ਨੇੜਤਾ ਸੀ। ਅਕਸਰ ਦੋਵੇਂ ਲੜਕੀਆਂ ਇਕ ਦੂਜੇ ਦੇ ਘਰ ਆ ਕੇ ਰਹਿੰਦੀਆਂ ਸਨ। ਪਰਿਵਾਰ ਵਾਲਿਆਂ ਨੂੰ ਇਤਰਾਜ਼ ਨਹੀਂ ਸੀ। ਬਿਨਾਂ ਰੁਕਾਵਟ ਦੇ ਘਰ ਆਉਂਦਿਆਂ ਦੋਵਾਂ ਦੀ ਦੋਸਤੀ ਹੌਲੀ-ਹੌਲੀ ਪਿਆਰ ਵਿਚ ਬਦਲ ਗਈ।
ਇਕ ਦੂਜੇ ਨਾਲ ਜ਼ਿੰਦਗੀ ਬਿਤਾਉਣ ਦਾ ਫੈਸਲਾ : ਦੋਵਾਂ ਦੋਸਤਾਂ ਨੇ ਇਕ ਦੂਜੇ ਨਾਲ ਜ਼਼ਿੰਦਗੀ ਬਿਤਾਉਣ ਦਾ ਫੈਸਲਾ ਕੀਤਾ ਹੈ। ਧੀਆਂ ਦੇ ਇਸ ਰਿਸ਼ਤੇ ਤੋਂ ਪਰਿਵਾਰਕ ਮੈਂਬਰ ਅਣਜਾਣ ਸਨ। ਦੋਵਾਂ ਲੜਕੀਆਂ ਨੇ ਆਪਣੇ ਮਨ ਦੀ ਗੱਲ ਪਰਿਵਾਰਕ ਮੈਂਬਰਾਂ ਨੂੰ ਦੱਸੀ।
ਉਨ੍ਹਾਂ ਕਿਹਾ ਕਿ ਉਹ ਜ਼ਿੰਦਗੀ ਭਰ ਲਿਵ ਇਨ ਵਿਚ ਰਹਿਣਾ ਚਾਹੁੰਦੀਆਂ ਹਨ। ਇਹ ਸੁਣ ਕੇ ਦੋਵਾਂ ਦੇ ਮਾਪਿਆਂ ਦੇ ਪੈਰਾਂ ਹੇਠੋਂ ਜ਼ਮੀਨ ਖਿਸਕ ਗਈ। ਦੋਵਾਂ ਨੂੰ ਮਨਾਉਣ ਦੀ ਬਹੁਤ ਕੋਸ਼ਿਸ਼ ਕੀਤੀ ਗਈ, ਪਰ ਉਹ ਮੰਨਣ ਨੂੰ ਤਿਆਰ ਨਹੀਂ ਸਨ। ਇਸਤੋਂ ਬਾਅਦ ਸ਼ਨੀਵਾਰ ਨੂੰ ਦੋਵਾਂ ਦੇ ਰਿਸ਼ਤੇਦਾਰ ਥਾਣੇ ਪਹੁੰਚੇ ਤੇ ਪੁਲਿਸ ਨੂੰ ਮਾਮਲੇ ਦੀ ਪੂਰੀ ਜਾਣਕਾਰੀ ਦਿੱਤੀ।
