ਲੁਧਿਆਣਾ, 9 ਜਨਵਰੀ | ਇੱਕ ਵਿਆਹ ਸਮਾਗਮ ਵਿਚ ਹੰਗਾਮਾ ਹੋ ਗਿਆ। ਮੈਰਿਜ ਪੈਲੇਸ ਦੀ ਇੱਕ ਵੀਡੀਓ ਸਾਹਮਣੇ ਆਈ ਹੈ, ਜਿਸ ਵਿਚ ਇੱਕ ਨਾਬਾਲਗ ਨੌਜਵਾਨ ਨੂੰ ਵਿਆਹ ਸਮਾਗਮ ਵਿਚ ਸ਼ਾਮਲ ਲੋਕਾਂ ਨੇ ਸ਼ਗਨ ਦਾ ਪਰਸ ਚੋਰੀ ਕਰ ਕੇ ਭੱਜਦੇ ਹੋਏ ਫੜ ਲਿਆ ਹੈ। ਲੋਕਾਂ ਨੇ ਇਸ ਘਟਨਾ ਦੀ ਵੀਡੀਓ ਵੀ ਬਣਾਈ ਅਤੇ ਨਾਬਾਲਗ ਦੇ ਹੱਥ ਬੰਨ੍ਹ ਕੇ ਪੁੱਛਗਿੱਛ ਕੀਤੀ। ਵਿਆਹ ਸਮਾਗਮ ‘ਚ ਆਏ ਵੇਟਰਾਂ ਨੇ ਪਰਸ ਖੋਹਣ ਦੀ ਕੋਸ਼ਿਸ਼ ਕਰ ਰਹੇ ਸਨੈਚਰ ਨੂੰ ਖੇਤਾਂ ‘ਚ ਘੇਰ ਕੇ ਫੜ ਲਿਆ।
ਜਾਣਕਾਰੀ ਅਨੁਸਾਰ ਇਹ ਵੀਡੀਓ ਫ਼ਿਰੋਜ਼ਪੁਰ ਰੋਡ ਪਿੰਡ ਪੰਡੋਰੀ ਨੇੜੇ ਮੈਰਿਜ ਪੈਲੇਸ ਗਰੇਡ ਵਿਲਾ ਤੋਂ ਸਾਹਮਣੇ ਆਇਆ ਹੈ। ਵੀਡੀਓ ‘ਚ ਕੁਝ ਲੋਕ ਨਾਬਾਲਗ ਨੂੰ ਹੱਥ ਬੰਨ੍ਹ ਕੇ ਫੜ ਰਹੇ ਹਨ। ਵੀਡੀਓ ‘ਚ ਜਾਣਕਾਰੀ ਦਿੰਦੇ ਹੋਏ ਇਕ ਵਿਅਕਤੀ ਨੇ ਦੱਸਿਆ ਕਿ 8 ਜਨਵਰੀ ਨੂੰ ਗ੍ਰੇਡ ਵਿਲਾ ‘ਚ ਇਕ ਵਿਆਹ ਸਮਾਗਮ ਦੌਰਾਨ ਇਕ ਨਾਬਾਲਗ ਨੂੰ ਫੜਿਆ ਗਿਆ ਸੀ।
ਇਹ ਨਾਬਾਲਗ ਸਵੇਰ ਤੋਂ ਹੀ ਵਿਆਹ ਸਮਾਗਮ ਦੀ ਤਿਆਰੀ ਕਰ ਕੇ ਆਇਆ ਹੋਇਆ ਸੀ। ਉਸ ਦੇ ਨਾਲ ਆਏ 2 ਤੋਂ 3 ਵਿਅਕਤੀ ਫਰਾਰ ਹਨ। ਵਿਆਹ ਸਮਾਗਮ ਵਿਚ ਉਕਤ ਨੌਜਵਾਨ ਨੇ ਵਿਆਹ ਕਰਵਾਉਣ ਜਾ ਰਹੀ ਲੜਕੀ ਦੇ ਪਿਤਾ ਤੋਂ ਸ਼ਗਨ ਦਾ ਪਰਸ ਖੋਹ ਲਿਆ ਅਤੇ ਭੱਜ ਗਿਆ। ਇਸ ਨਾਬਾਲਗ ਸਨੈਚਰ ਨੂੰ ਗ੍ਰੇਡ ਵਿਲਾ ਦੇ ਸਟਾਫ਼ ਅਤੇ ਹੋਰ ਵੇਟਰਾਂ ਨੇ ਖੇਤਾਂ ਵਿਚ ਘੇਰ ਕੇ ਕਾਬੂ ਕਰ ਲਿਆ। ਉਕਤ ਨੌਜਵਾਨ ਆਪਣਾ ਨਾਂ ਸਰਬਜੀਤ ਦੱਸ ਰਿਹਾ ਹੈ ਪਰ ਇਹ ਉਸ ਦਾ ਨਾਂ ਨਹੀਂ ਹੈ।
ਜੇਕਰ ਕਿਸੇ ਕੋਲ ਵੀ ਇਸ ਨੌਜਵਾਨ ਦੀ ਚੋਰੀ ਬਾਰੇ ਕੋਈ ਜਾਣਕਾਰੀ ਹੈ ਤਾਂ ਕਿਰਪਾ ਕਰਕੇ ਸਾਨੂੰ ਦੱਸੋ। ਲੜਕੀ ਦੇ ਪਿਤਾ ਨੇ ਦੱਸਿਆ ਕਿ ਇੱਕ ਮਿੰਟ ਦੇ ਅੰਦਰ ਹੀ ਚੋਰ ਉਸ ਦੇ ਹੱਥੋਂ ਬੈਗ ਖੋਹ ਕੇ ਫਰਾਰ ਹੋ ਗਏ। ਪੁਲਿਸ ਪ੍ਰਸ਼ਾਸਨ ਅਤੇ ਮੈਰਿਜ ਪੈਲੇਸ ਦੇ ਅਧਿਕਾਰੀਆਂ ਨੂੰ ਬੇਨਤੀ ਹੈ ਕਿ ਵਿਆਹ ਸਮਾਗਮ ਵਿਚ ਸੁਰੱਖਿਆ ਨੂੰ ਯਕੀਨੀ ਬਣਾਇਆ ਜਾਵੇ।