ਚੰਡੀਗੜ੍ਹ/ਜਲੰਧਰ, 1 ਫਰਵਰੀ | ਪੰਜਾਬ ਬਚਾਓ ਮੋਰਚਾ ਵੱਲੋਂ ਪ੍ਰਧਾਨ ਤੇਜਸਵੀ ਮਿਨਹਾਸ ਦੀ ਅਗਵਾਈ ‘ਚ ਸੈਕਟਰ 17 ਵਿੱਚ ਅੰਧਵਿਸ਼ਵਾਸ, ਧੋਖਾਧੜੀ ਵਾਲੀਆਂ ਧਾਰਮਿਕ ਗਤੀਵਿਧੀਆਂ ਅਤੇ ਧਰਮ ਪਰਿਵਰਤਨਾਂ ਖ਼ਿਲਾਫ਼ ਪ੍ਰਦਰਸ਼ਨ ਅਤੇ ਮੋਮਬੱਤੀ ਮਾਰਚ ਕੀਤਾ ਗਿਆ।
ਇਹ ਪ੍ਰਦਰਸ਼ਨ ਉਹਨਾਂ “ਖੁਦ-ਘੋਸ਼ਿਤ ਗੋਡਮੈਨਾਂ” ਅਤੇ “ਚਮਤਕਾਰੀ ਪਾਸਟਰਾਂ” ਦੇ ਖ਼ਿਲਾਫ਼ ਸੀ, ਜਿਹੜੇ ਨਿੱਜੀ ਅਤੇ ਆਰਥਿਕ ਲਾਭ ਲਈ ਝੂਠੇ ਚਮਤਕਾਰਾਂ, ਭ੍ਰਮਕ ਪ੍ਰਚਾਰ ਅਤੇ ਡਰ ਦਾ ਮਾਹੌਲ ਬਣਾਉਣ ਦੇ ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਹਨ।
ਪ੍ਰਦਰਸ਼ਨ ‘ਚ ਧਾਰਮਿਕ ਨੇਤਾ, ਕਿਸਾਨ ਮੋਰਚਾ, ਵਿਦਿਆਰਥੀ ਸੰਘ, ਬਾਰ ਐਸੋਸੀਏਸ਼ਨ ਅਤੇ ਹੋਰ ਸਮਾਜਿਕ ਸੰਗਠਨਾਂ ਦੇ ਪ੍ਰਤੀਨਿਧੀ ਸ਼ਾਮਲ ਹੋਏ। ਵਕਤਾਵਾਂ ਨੇ ਦੋਸ਼ ਲਗਾਇਆ ਕਿ ਪੰਜਾਬ ਵਿੱਚ ਲਾਲਚ, ਧੋਖਾ, ਦਬਾਅ ਅਤੇ ਗਲਤ ਜਾਣਕਾਰੀ ਦੇ ਆਧਾਰ ’ਤੇ ਧਰਮ ਪਰਿਵਰਤਨ ਕੀਤੇ ਜਾ ਰਹੇ ਹਨ, ਜੋ ਇੱਕ ਸੰਵੇਦਨਸ਼ੀਲ ਸਰਹੱਦੀ ਰਾਜ ਲਈ ਗੰਭੀਰ ਚੁਣੌਤੀ ਹੈ।
ਤੇਜਸਵੀ ਮਿਨਹਾਸ ਨੇ ਕਿਹਾ ਕਿ ਕੁਝ ਵਿਅਕਤੀ ਬਿਨਾਂ FCRA ਲਾਇਸੈਂਸ ਦੇ ਵਿਦੇਸ਼ੀ ਫੰਡ ਪ੍ਰਾਪਤ ਕਰ ਰਹੇ ਹਨ ਅਤੇ ਇਸ ਪੈਸੇ ਨੂੰ ਵੱਡੇ ਪੱਧਰ ’ਤੇ ਪ੍ਰਚਾਰ, ਨਿੱਜੀ ਬ੍ਰਾਂਡਿੰਗ ਅਤੇ ਲੋਕਾਂ ਨੂੰ ਗੁਮਰਾਹ ਕਰਨ ਲਈ ਵਰਤ ਰਹੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਹਜ਼ਾਰਾਂ ਗਰੀਬ ਅਤੇ ਕਮਜ਼ੋਰ ਲੋਕ ਝੂਠੇ ਚਮਤਕਾਰਾਂ ਅਤੇ ਇਲਾਜ ਦੇ ਵਾਅਦਿਆਂ ਕਾਰਨ ਸ਼ੋਸ਼ਣ ਦਾ ਸ਼ਿਕਾਰ ਹੋ ਰਹੇ ਹਨ।
ਮਿਨਹਾਸ ਨੇ ਕਿਹਾ- ਪੰਜਾਬ ਸਰਕਾਰ ਐਸੀਆਂ ਗਤੀਵਿਧੀਆਂ ਖ਼ਿਲਾਫ਼ ਕਾਰਵਾਈ ਕਰਨ ਦੀ ਬਜਾਏ ਉਨ੍ਹਾਂ ਨੂੰ ਮੰਚ, ਸਰਕਾਰੀ ਸਮਾਗਮਾਂ ਅਤੇ ਅਹੁਦਿਆਂ ਰਾਹੀਂ ਉਤਸ਼ਾਹਿਤ ਕਰ ਰਹੀ ਹੈ।