ਕੋਟ ਈਸੇ ਖਾਂ, 11 ਦਸੰਬਰ | ਆਸ-ਪਾਸ ਦੇ ਪਿੰਡਾਂ ਵਿਚ ਠੱਗੀਆਂ ਮਾਰਨ ਵਾਲੀਆਂ ਔਰਤਾਂ ਦਾ ਗਿਰੋਹ ਹਰ ਰੋਜ਼ ਕਿਸੇ ਨਾ ਕਿਸੇ ਨੂੰ ਠੱਗੀ ਦਾ ਸ਼ਿਕਾਰ ਬਣਾ ਰਿਹਾ ਹੈ। ਅਜਿਹੀ ਹੀ ਇੱਕ ਘਟਨਾ ਕੋਟ ਈਸੇ ਖਾਂ ਨੇੜੇ ਪਿੰਡ ਲੋਹਾਰਾ ਵਿਚ ਵਾਪਰੀ, ਜਿੱਥੇ ਠੱਗ ਔਰਤਾਂ ਨੇ ਇੱਕ ਦੁਕਾਨਦਾਰ ਨੂੰ ਠੱਗੀ ਦਾ ਸ਼ਿਕਾਰ ਬਣਾਉਣ ਦੀ ਕੋਸ਼ਿਸ਼ ਕੀਤੀ। ਵਾਰਦਾਤ ਨੂੰ ਅੰਜਾਮ ਦੇਣ ਵਾਲੀਆਂ ਔਰਤਾਂ ਦੀ ਉਮਰ 45 ਸਾਲ ਦੇ ਕਰੀਬ ਸੀ।
ਉਸ ਦੇ ਨਾਲ ਇੱਕ ਲੜਕੀ ਵੀ ਸੀ, ਜਿਸ ਦੀ ਉਮਰ ਕਰੀਬ 23-24 ਸਾਲ ਲੱਗ ਰਹੀ ਸੀ। ਇਨ੍ਹਾਂ ਤਿੰਨਾਂ ਨੇ ਇਕ ਯੋਜਨਾ ਬਣਾਈ ਅਤੇ ਨੌਜਵਾਨ ਲੜਕੀ ਨੂੰ ਦੁਕਾਨਦਾਰ ਨੂੰ ਧੋਖਾ ਦੇਣ ਲਈ ਦੁਕਾਨ ਦੇ ਅੰਦਰ ਭੇਜ ਦਿੱਤਾ। ਦੋ ਔਰਤਾਂ ਬਾਹਰ ਖੜ੍ਹੀਆਂ ਸਨ ਅਤੇ ਲੜਕੀ ਦੁਕਾਨ ਦੇ ਅੰਦਰ ਚਲੀ ਗਈ ਅਤੇ ਪ੍ਰਸ਼ਾਦ ਖਰੀਦਣ ਦੇ ਬਹਾਨੇ ਪੈਸੇ ਦੇਣ ਲੱਗੀ। ਜਦੋਂ ਦੁਕਾਨਦਾਰ ਨੇ ਬਾਕੀ ਪੈਸੇ ਵਾਪਸ ਕੀਤੇ ਤਾਂ ਲੜਕੀ ਨੇ ਦੁਕਾਨਦਾਰ ਦਾ ਹੱਥ ਫੜ ਕੇ ਰੌਲਾ ਪਾਇਆ ਕਿ ਦੁਕਾਨਦਾਰ ਨੇ ਉਸ ਦਾ ਹੱਥ ਫੜ ਲਿਆ ਹੈ।
ਇਸ ਤੋਂ ਬਾਅਦ ਦੁਕਾਨਦਾਰ ਨੂੰ ਪਤਾ ਲੱਗ ਗਿਆ ਕਿ ਠੱਗੀ ਕਰਨ ਵਾਲੀਆਂ ਔਰਤਾਂ ਹਨ ਅਤੇ ਉਨ੍ਹਾਂ ਨੂੰ ਦੁਕਾਨ ਤੋਂ ਬਾਹਰ ਕੱਢ ਦਿੱਤਾ। ਇਸ ਦੌਰਾਨ ਆਸ-ਪਾਸ ਦੇ ਦੁਕਾਨਦਾਰ ਵੀ ਇਕੱਠੇ ਹੋ ਗਏ, ਜਿਸ ਤੋਂ ਬਾਅਦ ਔਰਤਾਂ ਭੰਬਲਭੂਸੇ ਵਿਚ ਪੈ ਗਈਆਂ ਅਤੇ ਦੁਕਾਨਦਾਰ ਧੋਖੇ ਦਾ ਸ਼ਿਕਾਰ ਹੋਣ ਤੋਂ ਬਚ ਗਿਆ ਹੈ।