ਅਹਿਮਦਾਬਾਦ। ਗੁਜਰਾਤ ਵਿਧਾਨ ਸਭਾ ਚੋਣਾਂ ਦੇ ਪਹਿਲੇ ਪੜਾਅ ਦੇ ਪ੍ਰਚਾਰ ਦਾ ਅੱਜ ਆਖਰੀ ਦਿਨ ਹੈ। ਇਸ ਦੌਰਾਨ ਕਾਂਗਰਸ ਪ੍ਰਧਾਨ ਮਲਿਕਾਰਜੁਨ ਖੜਗੇ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ‘ਤੇ ਦਿੱਤੇ ਬਿਆਨ ਨੇ ਹੰਗਾਮਾ ਮਚਾ ਦਿੱਤਾ ਹੈ। ਦਰਅਸਲ, ਗੁਜਰਾਤ ਵਿੱਚ ਇੱਕ ਰੈਲੀ ਨੂੰ ਸੰਬੋਧਿਤ ਕਰਦੇ ਹੋਏ ਖੜਗੇ ਨੇ ਬੀਜੇਪੀ ਵਲੋਂ ਵੋਟ ਮੰਗਣ ਉੱਤੇ ਪੀਐਮ ਮੋਦੀ ਉੱਤੇ ਚੁਟਕੀ ਲਈ। ਉਨ੍ਹਾਂ ਕਿਹਾ ਕਿ ‘ਮੋਦੀ ਹਰ ਚੋਣ ‘ਚ ਨਜ਼ਰ ਆਉਂਦੇ ਹਨ, ਕੀ ਉਨ੍ਹਾਂ ਦੇ ਰਾਵਣ ਵਰਗੇ 100 ਸਿਰ ਹਨ?’ ਖੜਗੇ ਦੇ ਇਸ ਬਿਆਨ ‘ਤੇ ਭਾਜਪਾ ਨੇ ਜਵਾਬੀ ਕਾਰਵਾਈ ਕੀਤੀ ਹੈ।
ਗੁਜਰਾਤ ਦੇ ਅਹਿਮਦਾਬਾਦ ‘ਚ ਰੈਲੀ ਦੌਰਾਨ ਕਾਂਗਰਸ ਪ੍ਰਧਾਨ ਨੇ ਕਿਹਾ, ‘ਭਾਜਪਾ ਕਹਿੰਦੀ ਹੈ ਕਿ ਨਗਰ ਨਿਗਮ ਚੋਣਾਂ ‘ਚ ਵੀ ਮੋਦੀ ਨੂੰ ਵੋਟ ਦਿਓ… ਕੀ ਮੋਦੀ ਇੱਥੇ ਕੰਮ ਕਰਨ ਆਉਣਗੇ? ਪ੍ਰਧਾਨ ਮੰਤਰੀ ਹਰ ਸਮੇਂ ਆਪਣੇ ਬਾਰੇ ਹੀ ਬੋਲਦੇ ਹਨ, ਕਿਸੇ ਨੂੰ ਨਾ ਦੇਖੋ, ਮੋਦੀ ਨੂੰ ਦੇਖ ਕੇ ਵੋਟ ਪਾਓ। ਕਿੰਨੀ ਵਾਰ ਤੁਹਾਡਾ ਚਿਹਰਾ ਦੇਖਣਾ ਹੈ। ਕਾਰਪੋਰੇਸ਼ਨ ‘ਚ ਵੀ ਤੇਰਾ ਚਿਹਰਾ ਦੇਖਿਆ, MLA ਚੋਣਾਂ ‘ਚ ਵੀ ਤੁਹਾਡਾ ਚਿਹਰਾ ਦੇਖਿਆ, MP ਚੋਣਾਂ ‘ਚ ਵੀ ਤੁਹਾਡਾ ਚਿਹਰਾ ਦੇਖਿਆ.. ਕੀ ਤੁਹਾਡੇ ਰਾਵਣ ਵਾਂਗ 100 ਚਿਹਰੇ ਹਨ?
ਖੜਗੇ ਦੇ ਬਿਆਨ ‘ਤੇ ਭਾਜਪਾ ਨੇ ਹਮਲਾ ਬੋਲਿਆ ਹੈ
ਖੜਗੇ ਦੇ ਬਿਆਨ ‘ਤੇ ਭਾਜਪਾ ਹਮਲਾਵਰ ਹੋ ਗਈ ਹੈ। ਭਾਜਪਾ ਬੁਲਾਰੇ ਸੰਬਿਤ ਪਾਤਰਾ ਨੇ ਕਿਹਾ, ‘ਪੀਐਮ ਮੋਦੀ ਨੂੰ ਰਾਵਣ ਕਹਿਣਾ ਘੋਰ ਅਪਮਾਨ ਹੈ। ਮਲਿਕਾਰਜੁਨ ਖੜਗੇ ਨੇ ਪੂਰੇ ਗੁਜਰਾਤ ਦਾ ਅਪਮਾਨ ਕੀਤਾ ਹੈ। ਇਹ ਬਿਆਨ ਸਿਰਫ ਖੜਗੇ ਦਾ ਨਹੀਂ, ਸੋਨੀਆ ਗਾਂਧੀ ਅਤੇ ਰਾਹੁਲ ਗਾਂਧੀ ਦਾ ਹੈ। ਸੋਨੀਆ ਦੇ ਇਸ਼ਾਰੇ ‘ਤੇ ਪੀਐਮ ਦਾ ਅਪਮਾਨ ਹੋਇਆ ਹੈ। ਸੋਨੀਆ ਨੇ ਮੋਦੀ ਨੂੰ ਮੌਤ ਦਾ ਵਪਾਰੀ ਕਿਹਾ ਸੀ।