ਲੁਧਿਆਣਾ | MIG ਫਲੈਟ ਨੇੜੇ ਦਸਮੇਸ਼ ਨਗਰ ਤੋਂ ਇਕ ਵੀਡੀਓ ਸਾਹਮਣੇ ਆਇਆ ਹੈ, ਜਿਸ ‘ਚ ਦੇਖਿਆ ਜਾ ਰਿਹਾ ਹੈ ਕਿ ਕੁਝ ਨੌਜਵਾਨਾਂ ਨੇ ਇਲਾਕੇ ‘ਚ ਖੜ੍ਹੇ ਵਾਹਨਾਂ ਦੀ ਭੰਨਤੋੜ ਕੀਤੀ ਹੈ। ਇਹ ਝੜਪ ਦੋ ਧਿਰਾਂ ਵਿਚਾਲੇ ਹੋਈ। ਭੰਨਤੋੜ ਦੀ ਵੀਡੀਓ ਸਾਹਮਣੇ ਆਉਣ ਤੋਂ ਬਾਅਦ ਇਕ ਪੀੜਤ ਪੁਲਿਸ ਦੀ ਢਿੱਲਮੱਠ ਵਿਰੁੱਧ ਸ਼ਿਕਾਇਤ ਲੈ ਕੇ ਪੁਲਿਸ ਕਮਿਸ਼ਨਰ ਦਫ਼ਤਰ ਪਹੁੰਚਿਆ।
ਜਾਣਕਾਰੀ ਦਿੰਦੇ ਹੋਏ ਪੀੜਤ ਰਵਿੰਦਰ ਸਿੰਘ ਨੇ ਦੱਸਿਆ ਕਿ ਇਲਾਕੇ ‘ਚ ਕੁਝ ਨੌਜਵਾਨ ਨਸ਼ੇ ਦੀ ਤਸਕਰੀ ਕਰਦੇ ਹਨ। ਉਹ ਕੁਝ ਦਿਨ ਪਹਿਲਾਂ ਆਪਣੇ ਕਿਰਾਏਦਾਰ ਤੋਂ ਕਮਰੇ ਦਾ ਕਿਰਾਇਆ ਵਸੂਲਣ ਗਿਆ ਸੀ। ਜਦੋਂ ਉਹ ਕਿਰਾਇਆ ਇਕੱਠਾ ਕਰ ਕੇ ਵਾਪਸ ਜਾਣ ਲੱਗਾ ਤਾਂ ਕੁਝ ਨੌਜਵਾਨ ਉਸ ਦੀ ਕਾਰ ਦੀ ਭੰਨ-ਤੋੜ ਕਰ ਰਹੇ ਸਨ। ਜਦੋਂ ਉਸ ਨੇ ਉਨ੍ਹਾਂ ਨੂੰ ਕਾਰ ਤੋੜਨ ਤੋਂ ਰੋਕਿਆ ਤਾਂ ਉਨ੍ਹਾਂ ਨੇ ਉਸ ਦੀ ਬੁਰੀ ਤਰ੍ਹਾਂ ਕੁੱਟਮਾਰ ਕੀਤੀ। ਉਹ ਪਿਛਲੇ 17 ਦਿਨਾਂ ਤੋਂ ਥਾਣੇ ਦੇ ਗੇੜੇ ਮਾਰ ਰਹੇ ਹਨ ਪਰ ਅਸਲ ਮੁਲਜ਼ਮਾਂ ਖ਼ਿਲਾਫ਼ ਕੋਈ ਕਾਰਵਾਈ ਨਹੀਂ ਹੋ ਰਹੀ।
ਦੂਜੇ ਪਾਸੇ ਦੂਜੀ ਧਿਰ ਦੇ ਪਵਨ ਕੁਮਾਰ ਨੇ ਦੱਸਿਆ ਕਿ ਰਵਿੰਦਰ ਸਿੰਘ ਦੇ 5 ਤੋਂ 6 ਫਲੈਟ ਹਨ, ਜੋ ਉਸ ਨੇ ਕਿਰਾਏ ‘ਤੇ ਦਿੱਤੇ ਹਨ। ਪਵਨ ਅਨੁਸਾਰ ਰਵਿੰਦਰ ਨੇ ਪਹਿਲਾਂ ਉਸ ਦੀ ਕਾਰ ਦਾ ਸ਼ੀਸ਼ਾ ਤੋੜਿਆ। ਉਸ ਦੀ ਕਾਰ ਰਵਿੰਦਰ ਦੇ ਫਲੈਟ ਕੋਲ ਖੜ੍ਹੀ ਸੀ। ਉਸ ਨੇ ਕਾਰ ਦਾ ਸ਼ੀਸ਼ਾ ਤੋੜ ਕੇ ਪੁੱਛਿਆ ਕਿ ਉਹ ਆਪਣੀ ਕਾਰ ਕਿੱਥੇ ਪਾਰਕ ਕਰੇ।
ਪਵਨ ਅਨੁਸਾਰ ਜਦੋਂ ਉਹ ਰਵਿੰਦਰ ਨਾਲ ਗੱਲ ਕਰ ਰਿਹਾ ਸੀ ਤਾਂ ਉਸ ਨੇ ਪਹਿਲਾਂ ਉਸ ‘ਤੇ ਡੰਡਿਆਂ ਨਾਲ ਹਮਲਾ ਕਰ ਦਿੱਤਾ। ਇਸ ਸਬੰਧੀ ਇਲਾਕੇ ਦੇ ਲੋਕ ਵੀ ਥਾਣੇ ਵਿਚ ਗਵਾਹੀ ਦੇਣ ਲਈ ਤਿਆਰ ਹਨ। ਸਾਡੇ ਕੋਲ ਸਾਡੀ ਕਾਰ ਨੂੰ ਤੋੜੇ ਜਾਣ ਦਾ ਕੋਈ ਵੀਡੀਓ ਨਹੀਂ ਹੈ ਪਰ ਕਾਫ਼ੀ ਚਸ਼ਮਦੀਦ ਗਵਾਹ ਹਨ। ਰਵਿੰਦਰ ਇਲਾਕੇ ਦਾ ਮਾਹੌਲ ਖਰਾਬ ਕਰ ਰਿਹਾ ਹੈ।